Afp y Ap
Máax beetik u jala’achil u lu’umil Perú, Manuel Merino, tu k’a’aytaj u luk’ul ti’ meyaj ku taal u beetik ka’achij, úuchik u chukik jump’éel p’is k’iin káajak u beeta’al u jejeláasil líik’saj t’aan tumen táankelemo’ob, tu’ux kíim ka’atúul ti’ le ti’obi’ yéetel yanchaj uláak’ kex 100 u túul máax úuch loob ti’. Merinoe’ leti’e óoxtúul máak ts’o’ok u máan u beet u jala’achil lik’ul u ja’abil 2016, tu jach tukultaj ka’alikil táan ka’ach u meyaj Congresoe’ bix ken u beet ti’al u jóok’sik máax meyajnaj táanil ti’ Martín Vizcarra, máax jo’olbes jump’éel noj meyaj ti’al u xu’ulsa’al u tu’usul kaaj te’e lu’umo’.
T’aan tu’ux ku ya’alik yaan u ch’éenel u beetik u jala’achile’, tu beetaj úuchik u jach ya’abtal líik’saj t’aan ku beeta’al tumen u jejeláasil máako’ob ka’aj kíim le yáax ka’atúul máako’ob te’e yáax líik’saj t’aan beeta’ab te’e lu’umo’, ts’o’okole’ tumen yanchaj u jaats u yéet meyajo’ob jala’ache’ tu jáawsajo’ob xan u meyajo’obi’
Ka’aj u’uyab ba’ax tu ya’alaje’, jach ki’imak óolta’ab tumen u kaajil Lima. “Perúe’, unaj u jóok’ol táanil”; tu ya’alaj Merino.
