Foto: Fotograma de la película
Paax yéetel kuumbiae’ jach k’a’anan ti’al Ulises, máax táaka’an ichil u múuch’il Terkos, ichil u múuch’kajtalil Independencia, ti’ u lu’umil Monterrey. Leti’e’ yanchaj u p’atik u yotoch tu’ux kaja’an ka’achij ti’al u bin Estados Unidos, tu’ux yanchaj u k’éexel ya’abach ba’alob ti’ u kuxtal.
U cha’anil Ya no estoy aquí “ku náats’al ti’ ba’ax ku yu’ubik kaaj, tumen ma’ chéen jump’éelili’ ba’al ku ye’esiki’”, beey úuchik u ya’alik máax jo’olbes u beeta’al cha’an Fernando Frías de la Parra. U meyaje’ ts’o’ok u yéeya’al, ichil jo’op’éel uláak’o’obe’, ti’al u chikbesik México le ken k’u’ubuk u 93 u téenal u chíimpolalo’ob Óscar, ichil u jaatsil mejor película internacional, beey úuchik u ts’a’abal k’ajóoltbil tumen Academia Mexicana de Artes y Ciencias Cinematográficas (Amacc).
Jump’éel ba’ax táan u kaxta’al u ye’esa’al yéetel cha’ane’, ku ya’alik Frías de la Parrae’, leti’e’ ba’ax ku yáax tukulta’al le ken ila’ak juntúul táankelem jela’an bix u xáachebtmaj u tso’otsel u pool, tumen ku beeta’al tak u meemesilo’ob, ts’o’okole’ le je’elo’ klasiista ba’al yéetel chéen jump’éel ti’ le ba’ax ku yúuchul tumen yaan máako’ob yéetel kaajo’obe’ suuka’an u péech’óolta’alob chéen yóok’lal bixo’ob.
Ka’aj ts’a’ab k’ajóoltbil le cha’ana’ tu lu’umil Méxicoe’, jach utschaj tu yich ya’abach máak tumen ku chíikbesa’al cholombianoilo’obi’, leti’obe’ leti’e’ máaxo’ob t’u’ulpachtik junmúuch’ tuukul siijil tu lu’umil México, tu’ux ku jach yaabilta’al kuumbia, je’el bix u ye’esal ti’ u cha’anil Ya no estoy aquí, yéetel Ulises (Juan Daniel García Treviño), juntúul táankelem xi’ipal 17 u ja’abil.
Edición: Ana Ordaz
