Oochel: Centro de las Artes Indígenas
Te’e k’iino’oba’ jts’a’ab k’ajóoltbil ba’axo’ob meyajilo’ob tu náajaltajo’ob u yóoxtéenil u beeta’al Paris Peace Forum, jump’éel nu’ukbesaj tu’ux ku yáanta’al meyajo’ob yéetel múuch’kabilo’ob beetik meyajo’ob ti’al u yutsil kaajo’ob. Ichil máaxo’ob yéeya’abe’ ti’ yaan múul meyaj bíin beeta’ak tumen Centro de las Artes Indígenas yéetel Organización Mundial de Turismo, Centro Regional para la Salvaguardia del Patrimonio Cultural Inmaterial de América Latina, Alianza Mundial de Turismo Indígena beyxan Organización Civil Impacto, ku k’aba’tik Weaving the recovery (Tejiendo la recuperación) tu’ux yaan u yáanta’al u xchuuyilo’ob Totonacapan, tu lu’umil Veracruz; Los Altos, Chiapas; Guatemala yéetel Perú.
Le meyaja’ yéeya’ab ichil maanal 800 u p’éel noj meyo’ob k’u’ubo’ob ti’al u yila’al wa je’el u yáanta’alob yéetel le nu’ukbesaja’, ts’o’okole’ xak’alta’ab tumen sesenta u túul u jala’achilo’ob Noj Lu’umo’ob, máaxo’ob chíikbesik mola’ayo’ob ti’ jejeláas lu’umo’ob yaan yóok’ol kaab, kajnáalo’ob yéetel u mola’ayo’ob ku táakmuk’tiko’ob meyajo’ob ku beeta’al yéetel ku líik’sa’al ti’al u yutsil kaaj yéetel yóok’ol kaab.
U meyajil Weaving the recovery yaan u kaxtik u táakmuk’tik ba’ax u yojel u beet kaaj, ti’ múuch’ilo’ob yéetel tse’eko’ob, beyxan yaan u páaktik u beel jejeláas ba’ax je’el u páajtal u beeta’al ti’al u mu’uk’ankúunsa’al u meyajil chuuy, yéetel xan ti’al u kaláanta’al ba’ax jets’a’an beey patrimonio cultural.
