U virtualil múuch’táambal G20e’, táan u chúunul te’e ja’aba’ yéetel u tuukulil u jóok’sa’al táanil kaaj yóok’lal nojoch talamilo’ob yaan yóok’lal COVID-19, beyxan táan u kaxta’al ka yanak múul meyaj ichil lu’umob táakano’obi’ ti’al u aktáanta’al pak’be’en k’oja’an. Múuch’táambale’ jts’o’ok le domingo máanika’, yéetel mokt’anta’ab u yantal taak’in ti’al u beeta’al u yantal u báakunail óotsil kaajo’ob.
“Ts’o’ok u chan nonojtal ba’al kbeet te’e ja’aba’, ts’o’ok kbeetik ba’ax t-a’alaj ti’al u páajtal kmúul meyaj tu táan COVID-19, tumen beey kéen kaláanta’al u kuxtal máak yéetel xan máaxo’ob jach mina’an ti’ob ti’al u kuxtalo’obi’”, beey tu ya’alaj u ajawil Arabia Saudita, Salmán bin Abdelaziz, lu’um tu’ux jo’olbesa’ab u beeta’al múuch’tambal.
Ka’aj ts’o’ok u níib óoltik uláak’ aj-jo’olbesaj máako’ob táakpajao’ob te’e ka’ap’éel k’iino’ob xáanchaj múuch’tsikbale’, jts’a’ab u páajtalil u t’aan, Giussepe Conte, máax beetik u jala’achil Italia, tumen leti’ ken u jo’olbes G20 lik’ul u yáax k’iinil diciembre, ba’ale’ leti’e’ tu ya’alaj jach táan k’a’anan u ts’aatáanta’al tuláakal ba’ax ku beeta’al yóok’lal cambio climático, tumen ti’ leti’e’ yaan u tuukulil “u péektsilta’al ka k’a’abéetkunsa’ak téeknologias séeba’antak yéetel utstak ti’al yóok’ol kaab”, ts’o’okole’ k’a’anan xan u mu’uk’anchajal múul meyaj ichil noj lu’umo’ob k’as káaj u sa’atal ka’alikil táan u beetik u jala’achil Estados Unidos, Donald Trump.
Ti’al u páajtal u beetchajale’, táan u binetik 28 mil millonesil dólares ti’al u páajtal u bo’otal meyajo’ob u ti’al. Ti’ le je’elo’obo’, 4 mil 200 millonesile’ yaan u k’a’abéetchajal ti’al u ts’o’okbal le ja’aba’.
