Leopoldo Luque, jts’akyaj kaláantik ka’ach Diego Maradona ti’ je’el ba’axak k’oja’alnile’, “jts’a’ab u kuuch yóok’lal homocidio culposo” úuchik u xak’alta’al kúuchil tu’ux ku ts’áak kóonsultaob yéetel u yotoch, beey úuchik u ya’alal ti’ agencia Télam. Júudisialo’obe’ tu ya’alajo’ob ba’ax ku beeta’al walkila’, leti’e’ xaak’alilo’ob ti’al u yila’al wa tu beetaj wa ma’ jump’éel ba’al ma’ no’ojani’. Le beetik beorae’ ma’ táan u k’a’alali’.
Ti’al túun u páajtal u ts’a’abal u kuuch Luquee’, yanchaj u ts’áak u testimonioil Dalma, Gianinna yéetel Jana, u paalal Maradona, máax 60 u ja’abil ka’achij. Leti’obe’ tu ya’alajob ma’ ki’imak u yóolo’ob yéetel bix úuchik u beeta’al ba’al ti’al u túuxta’al áantaj tu yotoch Maradona, tu distritoil Tigre, tu xamanil le noj kaajo’.
“Láayli’ tan u beeta’al u meyajil xaak’al yéetel táan u kaxta’al je’el ba’axak pruuebail yaan, je’el bix u tsikbal u láak’o’ob, máaxo’ob tu yilajo’ob bix úuchik tuláakl ba’al”, beey a’alab ti’ jump’éel k’a’aytajil ts’íib jts’a’ab k’ajóoltbil tumen Fiscalía General de San Isidro, tu xamanil Buenos Aires. Tak walkila’, Luquee’ ma’ u yóot u ya’al mixba’al tu yóok’lal le ba’ax táan u yúuchula’.
