Alma E. Muñoz y Néstor Jiménez
Jala’ach Andrés Manuel López Obradore’ ku tukultike’ chéen p’el u máan 10 ti’ diciembree’ yaan u ts’ook éejenta’al u báakunail Pfizer tumen Estados Unidos, ti’al beyo’ u éejenta’al xan tu lu’umil México. Ken ts’o’okoke’, u mola’ayilo’ob Marina yéetel Defensa Nacional yaan u káajsik u k’i’itbesiko’ob ti’al u páajtal u k’uchul ti’ kaaj.
Beey túuno’, jala’ache’ tu ya’alaje’, wa tumen ku ts’ook je’ets’el u yáax ts’a’abal báakuna ti’ ajts’akyajo’ob yéetel ti’ máaxo’ob ku meyajo’ob ti’ u kúuchil ts’akyaj tu’ux ku ts’aatáanta’al COVID-19, u ti’al leti’e’ “ma’ táan u yantali’. Tene’ míin kin wokol ichil u múuch’il máako’ob sajbe’entsil yanik, tumen yaanten hipertensión yéetel tumen ts’o’ok in nojoch máaktal”, tu ya’alaj. Beyxan ma’ tu tselaj u páajtalil u yáax ts’a’abal xan ti’ ajka’ansajo’ob.
Tu ka’a a’alaj jatsa’an 20 mil millonesil pesos ti’al u páajtal u ma’anal le ts’aako’. “Yaan to’on u taak’inil, chéen táan u binetik u ts’ook éejenta’al u yutsil meyaj, ka ila’ak jach jeets’el bix beeta’anil ti’al u páajtal u ts’a’abal ti’ máak, tumen beey táan u tukulta’al u beeta’al yéetel yaan u ts’a’abal k’ajóolbtil le martes ku taala’” tumen u secretariosil Relaciones Exteriores, Marcelo Ebrard; Salud, Jorge Alcocer yéetel u subsecretarioil Hugo López-Gatell.
“Ts’o’ok u éejenta’al u k’a’abéetkunsa’al Inglaterra, yéetel míin tak 10 ti’ diciembre ken tsikbalta’ak yéetel ken je’ets’ek u ts’a’abal xan Estados Unidos, ken ts’o’okok túune’, ku éejenta’al yéetel ku káajal u k’i’itbesa’al weye’”.
Edición: Sasil Sánchez
