Te’e k’iino’oba’, u nojoch máakilo’ob Gran Consejo yéetel máaxo’ob táaka’ano’ob ichil maaya najilo’ob k’uje’, tu k’ubajo’ob U A’almajt’aanil Quintana Roo suta’an ich maayat’aan. Tóoch’banaj u beeta’al le meyaja’ úuchak u ya’alal tumen máax jo’olbesik Comisión de Turismo ichil Cámara de Diputados, Luis Alegre.
A’almaj t’aan ich maayae’ yáax k’u’ub Cámara de Diputados del Congreso de la Unión, ts’o’okole’ jbiinsa’ab Senado de la República, tu’ux chíimpolta’ab u k’a’ananil le meyaja’ tumen máax jo’olbesik Gran Consejo Maya, Simón Caamal.
“To’one’ úuch tu’ubsako’on, ba’ale’ bejla’e’ taalo’on ti’al k-e’es máaxo’oni’. Taalo’on ktaas A’almajt’aan ich maaya, ts’o’okole’ k’as talam ktaal weye’ yóok’lal pak’be’en k’oja’an yaan; yóok’ol kaabe’ séeba’an u péek, ba’ale’ ti’al ba’ax k’a’anane’ jach xaan u bin. Maanal 500 ja’abo’ob yanchaj u máan ti’al ka pakta’ako’on yéetel ti’al ka chan beeta’ak wa ba’ax yóok’lal u yúuchben kaajo’ob Quintana Roo”, tu ya’alaj Caamal.
A’almajt’aane’ chíimpolta’ab tumen 317 u túul maaya wíiniko’ob, beyxan tumen u jala’achil México, Andrés Manuel López Obrador; u jala’achil Quintana Roo, Carlos Joaquín; beyxan u jala’achil Tribunal Superior, Antonio León Ruiz; diputado federal Luis Alegre Salazar; máaxo’ob táaka’an ichil 16 legislatura del Congreso estatal yéetel tumen máaxo’ob beey u meyajil sutt’aan.
Edición: Sasil Sánchez
