U k’oja’anil COVID-19 káaj u máan ti’ tuláakal yóok’ol kaab le ja’ab máaniko’, tu beetaj u k’éexel ya’abach ba’al tuláakal tu’ux. Le beetike’, yanchaj xan u k’éexel tak bix u ts’a’abal xook yéetel u yúuchul kaambal. Tu yóok’lale’, tu lu’umil Mëxicoe’ káajsa’ab u nu’ukbesajil “Aprende en Casa”, ba’ale’ ajka’ansajo’ob je’el bix Alejandro Mis Can y|éetel David Elías Alejos Burgos, tu kaxtajo’ob bix u túumbenkunsiko’ob u meyajo’ob ti’al u páajtal u beetik u meyajil ka’ansaj, le beetike’ juntúul ti’ leti’obe’ chíimpolta’ab tumen Fundación Red Ensamble Prácticas Innovadoras.
Alejandro Mise’ ku ya’alike’, u ka’ansik mejen paalale’ leti’ u tajan ma’alo’obil ba’ax páatchaj u beetik tu kuxtal, le beetike’ tu ts’áaj u yóol ti’al u ketik u meyajichil uláak’ 322 u p’éel nu’ukbesajo’ob túuxta’ab tumen uláak’ ajka’ansajo’ob tu lu’umil México, ka’aj yéeya’ab u ti’ali’ tumen tukulta’abe’ jach no’ojan u ts’áak xook ka’alikil táan u máan le k’oja’anila’.
Yáaxe’, meyajnaja’an ti’ u najilo’ob xook Consejo Nacional de Fomento Educativo (Conafe), le beetike’ u yojel bix kaja’an u ya’abil le paalalo’ob yaan ti’ le mejen kaajo’obo’, ts’o’okole’ walkila’ ti’ ku meyaj tu najil xook “21 de agosto”, tu chan kaajil Chan Xcail, yaan tu kaajil Chichimilá, tu’ux tu ts’áatáantaj u meyaj ti’al ma’ u p’atik u xook le paalalo’obo’.
Ka tu yilaj ma’ táan u páajtal u ts’áak xook je’el bix yaniko’ob ka’ache’, tu tukultaj u meyajtik ba’alo’ob yóok’lal bix u tséentikubáaj máak, ba’ax k’a’abéet u beetik máak ti’al u kaláantik u toj óolal yéetel bix u meyaj máak yéetel u puksi’ik’al beyxan u yóol máak, le beetike’, yanchaj u beetik 15 u p’éel fichas ti’al u nup’ik yéetel ba’ax ku taal te’e áanalte’obo’. Ka’aj ts’o’oke’ máan u t’ox tu yotoch u xoknáalo’obe’ yéetel tu yáakbesaj xan uláak’ máaxo’ob kaja’ano’ob te’e najo’.
Edición: Mirna Abreu
