Jala’ach Andrés Manuel López Obrador, u ajmeyajilo’ob jala’ach ti’ u lu’umil México yéetel máaxo’ob jo’olbesiko’ob mola’ayo’ob yéetel kúuchilo’ob meyaje’ tu jets’ajo’ob jump’éel mokt’aan jatsa’an, ti’al u k’áata’al ti’ Poder Legislativo ka bin náachkunsa’ak tak febrero u k’iinil ti’al u tojbe’enkunsa’al ba’ax k’ajólta’an beey subcontratación, ti’al beyo’ u ma’alobkúunsa’al bix u beeta’al. Ichil tuláakal máax táakpajo’ob te’e mokt’aano’oba’ tu jets’ajo’ob yaan u ts’áak u yóolo’ob ti’al u yutstal tu beel tuláakal ba’ax ku yúuchul ken t’a’anak meyaj máak jayp’éel k’iino’ob, ba’ale’ ku tse’elel meyajti’ob ken ch’éenek u k’a’abéetkunsa’alo’ob, ka’alikile’ mola’ayo’obe’ yaan u káajsik u tojkíinsik bix yanik u ajmeyajilo’ob.
“Te’e mokt’aano’ je’ets’ ka náachkunsa’ak u k’iinil kéen úuchuk tsikbal ichil máaxo’ob ku táakpajalo’obi’, jala’ach, mola’ayo’ob yéetel máaxo’ob ts’áak meyaj, tumen ichil ba’ax yaan u yil yéetel subcontratacióne’ ti’ yaan u t’o’oxol utilidades, tumen te’e yáax tsikbalil táan u beeta’al ka’acho’ ma’ táan u táakbesa’ali’. Beey túuno’, mola’ayo’obe’ tu k’áatajo’ob ka tsikbalta’ak, ma’ ti’al u tse’elel le páajtalil je’elo’ ti’ le ajmeyajo’obo’ tumen nojba’al uti’alo’ob; ba’ax u k’áato’obe’ leti’ ka beeta’ak ba’ax unaj yéetel je’el bix jets’a’an ti’ a’almajt’aan”, tu ya’alaj jala’ach.
Tu jach a’alaj jets’t’aan beeta’al tumen ku ya’alike’ “ma’ unaj u yantal subcontratación wa mina’an u xuul, ts’o’okole’ unaj ma’ seten k’a’abéetkunsa’al je’el bix ts’o’ok u beeta’al tak walkila’. U yuumil mola’ayo’obe’ ma’ xan táan u líik’sik u t’aano’ob ti’al u chíikbesiko’ob máaxo’ob ma’ no’ojan u k’a’abéetkunsiko’ob subcontratación, tumen leti’e’ ajmeyajo’ob ilik u jach talamil ba’al ba’ale’ beyxan hacienda pública.
“Leit’obe’ ti’ yano’ob ti’al u ts’aatáanta’al ba’ax ku yúuchul, tumen je’el bix u bin u beeta’al kex ma’ táan u méek’t’anta’al tumen a’almaj t’aane’, tumen ti’ ajmeyajo’obe’ ku luk’sa’al meyajti’ob ts’o’okole’ ma’ táan u chíimpolta’al prestaciones unaj u yantal ti’, tumen jach tu taal u ts’o’okbal ja’abe’ leti’ kéen jach úuchuk. Ku luk’sa’al meyaj ti’ máak, ts’o’okole’ ma’atech u ts’a’abal ti’ob áaguinaldo, mix u t’ooxil utilidades. Yaan u tuukulil u tojkíinsa’al ba’ax ku yúuchul yéetel lela’, ts’o’okole’ yaan u yila’al ka beeta’ak u jach ma’alobil ku páajtal ti’al u yutsil tuláakal máax ku táakpajali’, tumen najmal u ts’a’abal utilidades ti’ ajmeyaj máako’ob”.
Xak'alutskíinsa'an tumen: Sasil Sánchez Chan
