Kex tumen chi’ike’ (Nasua narica) ma’ juntúul ba’alche’ sajbe’entsil yanik u ch’éejeli’, ojéela’ane’ sajbe’entsil yanik u kuxtal tumen tu’ux kaja’ane’ mantats’ u k’askúunta’al yéetel ku suuktal xan ti’ wíinik tumen naats’ yanikti’ob.
Tu noj kaajil Cancúne’ suuk u yila’al ya’abach chi’ik, u ya’abile’ ti’ kúuchilo’ob je’el bix Ombligo Verde, Parque Urbano Kabah yéetel túumben kúuchil beeta’an ti’al u chíimpolta’alo’ob, Parque Coatí. U jejeláasil ba’alche’il Nasua Narica Nelsoni ti’ ku yantal tu petenil Cozumel ts’o’okole’ jatsa’an beey juntúul ba’alche’ sajbe’entsil yanik yéetel kaláanta’an tumen NOM 059-SEMARNAT- 2010.
Xak'alutskíinsa'an tumen: Sasil Sánchez Chan
