Tu k’iinil jo’olkeake’, u jala’achil u lu’umil Yucatáne’, Mauricio Vila Dosal, tu tóoch’taj u káajbal u meyaj Parque Eólico jbeeta’ab tu noj kaajil Tizimín, tu’ux k’a’abéetkunsa’ab maanal ti’ 3 millonesil pesos. Jala’ache’ tu k’a’aytaj te’e súutuko’ yaan u yantal uláak’ taak’in ti’al u beeta’al uláak’ jump’éel Parque je’el bix le ts’o’oksa’ana’, ti’al beyo’ u yantal TIzimín Fase 2, tumen yéetele’ yaan u kaxta’al ka béeyak u suut taak’in tuka’atéen tu lu’umil Yucatán yéetel ti’al xan u yantal meyaj ti’ máak.
Láayli’ te’elo’, máax jo’olbesik Fuerza y Energía Limpia de Tizimín, Jaime de la Rosa Frigolet, tu ya’alaje’, úuchik u beeta’al le túumben kúuchila’ yanchaj 330 u p’éel meyajo’obi’, yéetel walkila’, ti’al u páajtal u meyaje’, yanchaj u jóok’sa’al uláak’ 30i’. Beyxan yaan u yáantaj ti’al u ma’ u seen k’askúunta’al yóok’ol kaab yéetel yaan u yéensik le beyka’aj ku tojoltik u beeta’al éenerjia te’e lu’uma’, tumen te’e ja’aba’, ichil jump’éel orae’, 321 gigawatts (GW/h) ku beeta’ali’.
Úuchik u káajal u meyaje’, béeychaj u beeta’al maanal ti’ 640 GW/h, ts’o’okole’ le je’ela’ ku taal u ts’ae’ ku yantal éenerjia ti’ 115 mil najo’ob ti’ u lu’umil Yucatán. Yóok’lale’, ch’éen u jóok’sa’al óoli’ 70 mil u tóoneladasil dióxido de carbono.
Ka’aj t’aanaj jala’ache’, tuláakal ba’ax táan u beeta’ale’ ti’al u chan áanta’al talamilo’ob táan u yantal tumen táan u cokojtal yóok’ol kaab, je’el bix le seten k’a’amkach ja’ báan Yucatán te’e ja’aba’. K’a’anan u beeta’al meyajo’ob je’el bix le je’ela’ tumen ku beeta’al u suut taak’in yéetel uts ti’al yóok’ol kaab.
Xak'alutskíinsa'an tumen: Sasil Sánchez Chan
