Ikil u kaxta'al ka yanak máak u xíimbalt u péetlu'umil Yucatán yéetel ti'al u péektsilta'al xíinximbale', múuch' meyaj u plataformail Airbnb, beyxan Federación de Asociaciones Turísticas (Fematur) yéetel Fondo Mundial para la Naturaleza (WWF, yóok'lal bix u káajbal u k'aaba' ich inglés) ti'al u k'a'aytik u beetiko'ob jo'op'éel u nu'ukil bejo'ob ti'al u máan máak xíinximbal.
Meyaje' ku k'aaba'tik México por Tierra, yéetel u ti'al le je'ela' jóok'sa'ab u nu'ukil jo'op'éel bejo'ob ku páajtal u máan xíimbaltvbil kex tumen táan u máan u k'oja'anil COVID-19.
Ichil ba'ax a'alab tumen Airbnb, yéetel túumben ba'alo'ob táan u je'ets'el ti'al máaxo'ob ku máan xíinximbale', ma' táan u yantal sajbe'entsil yéetel ku yáantajo'ob ti'al u ka' líik'il máaxo'ob meyajtiko'ob ba'alo'ob beya'.
"Plataformaobe' ku ts'áako'ob u páajtalil u yantal meyaj ti' ya'abach máak kaja'an tu noj lu'umil México. Yéetel meyajo'ob je'ex México por Tierrae' táan u kaxta'al ka yanak múul meyaj ichil u yuumil mejen mola'ayo'ob yéetel u mejen kaajilo'ob México", beey úuchik u ya'alik Jorge Hernández, máax jo'olbesik Fematur.
U nu'uk bejo'ob ts'a'ab k'ajóoltbile' leti' le je'elo'oba':
El Corredor del Jaguar: Tuxtla Gutiérrez - San Cristóbal de la Casas - Lagunas de Montebello - Bonampak - Palenque - Palizada - Calakmul.
La Ruta del Sol: Ciudad de México - Tepoztlán - Atlatlahucan - Cuautla - Cuernavaca - Xochicalco - Tequesquitengo - Taxco - Xalitla - Acapulco.
Joyas del Pacífico: Guadalajara - Tequila - Talpa de Allende - San Sebastián del Oeste - Boca de Tomatlán - Puerto Vallarta - Sayulita - San Blas - Mexcaltitán - Mazatlán - Las Labradas.
Paraísos del Caribe: Holbox - Cancún - Puerto Morelos - Playa del Carmen - Cozumel - Akumal - Tulum - Muyil - Sian Ka’an - Bacalar - Mahahual.
Maravillas de la Península: Jo' - Izamal - Yaxunah - Saki' - Ek Balam - Ría Lagartos; Mérida - Uxmal - Hopelchén - Campeche - Champotón.
Xak'alutskíinsa'an tumen: Sasil Sánchez Chan
