Junmúuch’ u íinjenieroilo’ob Google’ tu k’a’aytajo’ob le lunes máanika’, u beetiko’ob jump’éel múuch’kabil. Le je’ela’ ma’ jump’éel ba’al suuk u yúuchul ichil máaxo’ob ku meyajtiko’ob téeknolojia.
Ichil múuch’kabil, yaan u k’aaba’tik Alphabet Workers Union (Sindicato de Trabajadores de Alphabet), yaan u yáax táakpajal kex 225 u túul u ajmeyajilo’ob Google yéetel u nojoch mola’ayil Alphabet.
Leti’obe’ chéen junjaats u muuk’il meyaj Alphabet ku chíikbesiko’ob, mix xan táan u chúukpajal u muuk’il ti’al u táakbesa’alo’ob ichil tsikbalil ku yantal yéetel Estados Unidos tu’ux ku je’ets’el jayp’éel ba’alo’ob yóok’lal meyaj.
Kex beyo’, túumben múuch’kabile’, yaan u táakbesa’al ichil Communication Workers of America, ts’o’okole’ yaan u “yúuchul meyaj ti’al ka béeyak u je’ets’el ti’ u ajmeyajilo’ob Google u páajtalil u k’éexel jayp’éel ba’alo’ob uts u ti’alo’ob ichil le mola’ayo’”.
Máaxo’ob táakano’obe’ ku ya’aliko’ob u k’áato’ob ka u’uyak u t’aano’ob, ma’ chéen ti’ ba’alo’ob yaan u yil yéetel u bo’olil, beyxan ti’ ba’ax unaj u ts’a’abal ti’ob, áantajo’ob yéetel le bix unaj u kaláanta’alo’ob ti’al ma’ u péech’óolta’alo’ob yéetel u ya’alal ba’al ti’ob, ts’o’okole’ unaj xan u tsikbalta’al ba’alo’ob unaj u beeta’al tumen le mola’ayo’.
Googlee’ mixba’al u ya’al tak walkila’
Tak walkila’ u beeta’al múuch’kabilo’ob tumen u ajmeyajil máako’ob téeknolojiae’ ma’ jump’éel ba’al suuka’an u yu’ubali’, tumen ma’alo’ob u náajalo’ob yéetel yaan xan uláak’ bix u ts’a’abal áantaj ti’ob, je’el bix u tséentalo’ob sáansamal yéetel u ts’a’abal ba’al ti’al u bino’ob yéetel u suuto’ob ti’ u meyajo’ob. Ba’ale’, ti’ le ts’ook ja’abo’oba’, u much’ikubáaj máako’ob ku meyajo’ob ti’ u mola’ayilo’ob téeknolojiae’ táan u bin u ya’abtal, yóok’lal ba’alo’ob yaan u yil yéetel péech’óolalil, beyxan sexual akooso, ba’ax je’ets’ ichil u poolitikáas Trump yéetel ikil u yila’al ma’ u k’a’abéetkunsa’al ba’ax ku beetiko’ob ti’al u beeta’al ba’ax ma’ unaji’.
“Jump’éel ba’ax beetik ma’ u seten yantal múuch’kabilo’ob ichil máaxo’ob ku meyajo’ob ti’ nojoch mola’ayo’ob téeknolojiae’, leti’e’ tuukul ku je’ets’el ichilo’obi’ tumen ku ts’a’abal u na’ato’obe’ leti’e’ nojoch mola’ay máax ken u táanilkuns u máakil yéetel tuláakal ba’ax k’a’abéet ti’”, beey úuchik u ya’alik Beth Allen, máax jo’olbesik kóomunikasiones ti’ CWA.
“Jach áantano’ob tu yóok’lal”; tu ya’alaj Allen, ba’ale’ tu tsikbaltaj xane’, ajmeyajo’obe’ táan u p’ilik u yicho’ob yéetel táan u yilko’obe’ “unaj u much’ikubáajo’ob ti’al u yantal u muuk’il u t’aano’ob”:
Xak'alutskíinsa'an tumen: Sasil Sánchez Chan
