de

del

U Congresoil Estados Unidose’ yanchaj u xchukul jáawsik u meyaj le miércoles máanika’, tu’ux yaan ka’ach u je’ets’el náajal yanchaj ti’ Joe Biden, ti’al u beetik u jala’achil le lu’umo’, tumen yanchaj máako’ob táakmuk’tik Donal Trump ooko’ob u beeto’ob xwo’okino’ob ichil Capitolio. 

Ka’ap’éel kaamarae’, Senado yéetel Cámara de Representantese’, yanchaj u k’a’alal, le beetik k’áata’ab ti’ léejisladooro’obe’ ka u ts’áajo’ob áantigaas k’ojo’ob yéetel ka pach’lako’ob lu’um.  

Yóok’lale’, u  jala’achil u lu’umil Estados Unidos, Donald Trump, tu túuxtaj t’aan ti’ máaxo’ob táak’muk’tik úuchak u yantal jejeláas líik’saj t’aano’ob yéetel loobilajil ichil Capitolio, le beetike’ tu k’áataj ti’ máak ka bin xi’ik tu yotoch, ba’ale’ kex beyo’ tu ya’alaj tuka’atéene’ “okolta’ab to’on yéeytambal”.  

“Kin na’atik ku yaatal ta wóole’ex, beeta’an a yaj óolale’ex. Yanchaj yéeytambal ka okolta’abo’on. Jujump’íitil úuchik u ya’abtal u wóowolal knáajal (yéeytambalo’ob) ts’o’okole’ tuláakal máak u yojel, tak le máaxo’ob ketiko’on. Ba’ale’ unaj a bine’ex ta wotoche’ex. Unaj u yantal to’on jets’óolal, ktáak’al ti’ ba’ax jeets’el ti’ a’almaj t’aan yéetel ma’ u yantal xwo’okinili’. Unaj kchíimpoltik máaxo’ob beetik u yantal jets’óolal”, tu ya’alaj jala’ach; Twittere’ tu tselaj u kueenta jala’ach yóok’lal 12 horas. 

Ichil xwo’okinil yanchaje’, ts’o’on juntúul ko’olel ka kíimij, beey úuchik u ts’a’abal k’ajóoltbil tumen kúuchil k’a’aytik péektsilo’ob NBC. Beyxan láayli’ te’e k’iino’, u jo’olpóopil Washingtone’ tu jets’aj u ch’éenel u máan máak ich kaaj ken u chuk 6 tu taal u yáak’abtal yéetel u páajtal u jóok’olo’ob tak las 6 tu taal u piik’il ti’ le juevesa’.  

Xak'alutskíinsa'an tumen: Sasil Sánchez Chan