Lalaj ja’abe’, Armando Manzaneroe’, suukchaj u jo’olbesik Día del Compositor, ba’ale’ te’e ja’aba’, yaan u chíimpolta’al tumen múuch’kabil jo’olbesa’an ka’ach tumen jk’aay, Sociedad de Autores y Compositores de México (SACM), le 15 ti’ enero ku taala’, yéetel xma’ bo’olil kéen úuchik ti’ Internet.
Yóok’lal ba’ax táan u yúuchul tumen u pak’be’en k’oja’anil COVID-19 yéetel úuchak u kíimil u yuumil Esta tarde vi llover, le 28 ti’ diciembre máaniko’, jela’an kéen máanak le k’iimbesaja’. Meyaje’ yaan u k’aaba’tik Día del Compositor 2021. Recordando al maestro Armando Manzanero yéetel yaan u máansa’al ti’ Facebook beyxan YouTube tumen SACM, kéen u chuk laas 4 ti’ u chíinil k’iin.
U jejeláasil paax
Maanal ti’ 40 u túul ajts’íib k’aayo’ob yéetel ajk’aayo’ob kéen táakpajako’obi’, ichilo’obe’ ti’ yaan: Martín Urieta, Manolo Marroquín, Manuel Alejandro, Reyli, Rafael Pérez Botija, Gloria Trevi, Aleks Syntek, Álex Lora, Alexander Acha, Fato, Jaime Flores, José Luis Roma, Joss Favela, Carlos Rivera, Natalia Lafourcade, Diego Verdaguer, Mario Domm, Leonel García y Gian Marco, ichil uláak’o’ob.
Manolo Marroquín, máax beetik u secretarioil Consejo Directivo ti’ SACM yéetel u yuumil u k’aayil El Príncipe, ichil uláak’o’obe’, tu ya’alaje’ “ichik ki’imak yéetel ok’om óol kéen úuchuk, tumen xa’ak’an ba’ax ku yu’ubik máak tu puksi’ik’al úuchik u p’áatal mina’an Manzanero. Jach yachaj t-óol úuchik u sa’atal u kuxtal, tumen juntúul ki’ichkelem máak, ku beetik u jach ki’imaktal u yóolil k kuxtal. Óoli’ tuláakal tu’ux k’ajóolta’an ka’achij.”
Walkila’, tu ya’alaj, “yaan u k’iimbesa’al Día del Compositor je’el bix suuk kbeetik, ba’ale’ u noj ba’alile’ tumen yaan k ki’imak óoltik kuxa’ano’on, leti’ u jach k’a’ananil. Ts’o’ok k jet’sike’, Martín Urieta ken p’áatak u jo’olbes múuch’kabil, le beetik táan u yilik ba’axo’ob ma’ ts’o’okspaj u beeta’ali’.”
Le ja’ab máaniko’, k’iimbesaje’ ti’ ku beeta’al tu kúuchil SACM. Marroquíne’ tu tsikbaltaje’, k’uch u k’iinil tu’ux jmu’uch’ tak 2 mil u túul máako’ob, ichil máaxo’ob ts’íibtik k’aayo’ob yéetel uláak’ máak páayt’anta’ab te’e k’iimbesajo’. Walkila’, táan k-ilik ka béeyak u yúuchul; Armando Manzaneroe’ u k’áat ka’ach ka béeyak u k’iimbesa’al je’ex suuka’ane’.
Lalaj 15 ti’ enero ma’atech u tsikbalta’al talamilo’ob yaan u yil yéetel bo’ol, náajal wa k’aayo’ob ku yu’ubal. Chéen ich ki’imak óolil u máan le súutuko’, ku méek’ikubáaj máak, ku yúuchul báaxal t’aan, ku yantal tsikbalilo’ob, ku yúuchul k’aay, ichil uláak’ ba’alo’ob.
“Manzaneroe’ mantats’ ku bin te’e k’iimbesajo’, ku p’atik tuláakal ba’ax ku beetik ti’al u páajtal u bini’; ts’o’okole’ je’el ba’axak k’iinil ka lúubuke’, leti’e’ 15 ku ch’a’abal ti’al u yúuchul le k’iimbesajo’”, tu ya’alaj.
Día del Compositor 2021. Recordando al maestro Armando Manzanero yaan u xáantal kex jo’op’éel ooraob.
Xak'alutskíinsa'an tumen: Sasil Sánchez Chan
