Úuchik u káajsa’al u 148 u meyajil Consejo Ejecutivo ti’ Organización Mundial de la Salud (OMS), máax jo’olbesik múuch’kabile’ Tedros Adhanom Ghebreyesus, t’aanaj yóok’lal le lu’umo’ob ma’ táan u páajtal u máanbiko’ob báakunail COVID-19i’ tumen mina’an u taak’inil ti’ob yóok’lal óotslil ku muk’yajtiko’ob, ts’o’okole’ tu ya’alaje’ le lu’umo’ob yu’ux asab ya’ab u taak’in yane’ máanjano’ob táanil wa ku ke’etel yéetel uláak’ lu’umo’ob.
“Ts’o’ok u jóok’sa’al maanal ti’ 39 millonesil báakunaob ti’ 49 u p’éel noj lu’umo’ob tu’ux chan yaan taak’in. Yéetel ti’ jump’éel óotsil lu’ume’ chéen páatchaj u ma’anal 25 u p’éelal. Ma’ 25 millonesi’, mix 25 mile’, chéen 25”, tu ya’alaj.
“K’a’abéet in wa’alik: yóok’ol kaabe’ ta’aytak u tejik u yoot’el u kaajil”, tu ya’alaj.
Beyxan tu k’áataj ti’ noj lu’umo’ob tsikbalnaja’ano’ob yéetel máaxo’ob beetik báakunaobe’ ka bin “u jach ch’a’anukto’ob tu beel mokt’aan beeta’al yéetel COVAX, tu’ux táaka’an jayp’éek unaj u yantali’, bajux u tojol yéetel ba’ax k’iin unaj u k’u’ubul”, ti’al beyo’ u páajtal u t’o’oxol je’el bix jets’a’anili’.
COVAXe’ jump’éel meyaj beeta’an tumen u lu’umilo’ob yóok’ol kaab yéetel OMS, ikil u kaxta’al ka kéet k’uchuk báakuna ti’ le jejeláasl lu’umilo’obo’.
Ti’al u tóoch’ta’al ba’ax ku yúuchule’, tu nojba’alil Día Mundial de la Salud 2021e’ yaan u ch’a’achibta’al xma’ keetil kuxtal yaan ichil u toj óolal wíinik, tu ya’alaj.
“Noj meyaj kin ts’áak tu táan tuláakal Noj lu’umo’ob táakano’obe’, leti’ ka béeyak, tu k’iinil 7 ti’ abril, Día Mundial de la Salud, u k’uchul u báakunail COVID-19 ti’ tuláakal noj lu’umo’obi’”, tu ya’alaj.
Ka’alikil yóok’ol kaab táan u jach meyaj ti’al u ma’ u seten beetik loob pak’be’en k’oja’anile’, yaan jayp’éel noj lu’umo’ob tu’ux ts’o’ok u káajal u ts’a’abal u báakunail jeets’el no’ojan u ti’al.
Ts’o’okole’, táan xan u meyajta’al 236 uláak’ u p’éel báakunao’ob ti’ yóok’ol kaab. 63 ti’ le je’elo’obo’ táan u jach xak’alta’al u yila’al bix jok’a’ano’ob, yéetel táan u meyajta’al ti’ lu’umo’ob je’el bix Alemania, China, Rusia, Reino Unido yéetel Estados Unidos, beey úuchik u ts’a’abal k’ajóoltbil tumen OMS le 12 ti’ enero máanika’.
Xak'alutskíinsa'an tumen: Sasil Sánchez Chan
