Fabrizio León Diez
Paul Antoine Matos
Sandra Gayou Soto
Lunes 12 ti' diciembre, 2016
Jo', Yucatán
[b]Sak yéetel boox áak’ab ti’ Jo’[/b]
Tukulta’an ma’ táan u cha’abal u yantal Noche Blanca tu kaajil Jo’ tumen yaan u k’áaxal ja’. Ba’ale’ chéen síis óolchaj u súutukil náaysaj óol.
Táankelemo’obe’ mulchajo’ob tu k’íiwikil le noj kaajo’ tu táan x k’aayil ti’ Chile, Mon Laferte.
Ma’ yanchaj x wo’okinili’, ba’ale’ chúumuk áak’abe’ u’uyab u tsikbalta’al tumen xíinximbal máako’ob jejeláas ba’alo’ob yóo’lal ba’ax táan u yúuchul ti’ Jo’, ba’ax ku binetik ti’ yéetel ba’ax uláak’ k’a’abéet.
____________________________________________________
[b]U jach ma’alo’ob áak’abil Jo’[/b]
Ka’atúul táanxel máako’ob, juntúule’ alemán, uláak’e Estados Unidos u kaajal, ikil u máano’ob xíinximbal tu k’íiwikil Jo’, ku k’áatchi’tiko’ob wa Noche Blanca ku kaxtik u jets’ik tuka’atéen u péech’óolalil sak wíinik yóok’ol maaya’ob. Ich inglés, ku k’a’aytalti’ob ba’ax táan u beeta’al, The White Night, u k’aaba’ le máank’inal patjo’oltan tumen Ayuntamiento, jump’éel k’aaba’ ku ye’esik ti’ aj táanxelil lu’umilo’ob péech’óol yanchaj yóok’ol máasewal máako’ob.
____________________________________________________
[b]Gallo Negro yéetel Mon Laferte[/b]
Chéen cháak ma’ tu binetaj ti’ u máank’inal La Noche Blanca, tu noj kaajil Jo’. Je’el bix ts’o’okili’ u yáax beeta’ale’, yanchaj ka’ap’éel kúuchil cha’an tu ti’itsilo’ob k’íiwik; yaan máak séeb jóok’ kutal aktáan ti’ le escenario j ts’a’ab yóok’ol u bejil 61 yéetel 60 tia’al u cha’antik u k’aay Mon Laferte.
Máaxo’ob konik dogos mina’ano’ob tu’ux suuk u yantalo’obi’. Ya’ab máak máan xíinximbal tia’al u kaxtik ba’al u jaantej; ts’o’okole’ ma’ xan yanchaj mixba’al cha’antbil chéen yóok’ol bej.
