La Jornada Nacional
Oochelo'ob: Ap yéetel ImageForum/Afp
K'iintsil
Lunes 28 ti' noviembre, 2016
Fidel Castro, máax tu jo’olbesaj ka yanak Revolución tu lu’umil Cuba, yéetel juntúul máax k’anan ba’alo’ob tu beetaj ti’ Siglo XX, j kíim le viernes máaniko’, yaan ka’ach 90 u ja’abil, beey j ts’a’ab k’ajóolbil tumen u suku’un, jala’ach Raúl Castro, ta’aytak chúumuk áak’ab ti’ le k’iin je’elo’.
Yaaj tu yóol u kaajil Cuba uchak u sa’atal u kuxtal comandante Fidel, le beetike’ u múuch’kabil Consejo de Estado ti’ Cuba tu jets’aj ka yanak bolonp’éel k’iin ti’ yaj óolal, uchik u kíimil Fidel Castro.
Bejla’a 28 ti’ noviembre, yaan u beeta’al jump’éel chíimpolal u tia’al, tu kúuchil u k’a’ajsal José Martí, yéetel yaan u páajtal u yila’al tumen je’el máaxake’. Sáamal 29, tu súutukil las 7 táan u taal u yáak’abtal, yaan u páajtal u múuch’ul máak tu k’íiwikil Plaza de la Revolución José Martí. Tu jo’oloj miércoles 30, leti’ ken biinsa’ak u ta’anil le animaso’; yaan u máansa’al yóok’ol le bej yáax xíimbalta’al le ka j beeta’ab La Caravana de la Libertad, tu winalil enero ti’ u ja’abil 1959, tak le ken k’uchuk Santiago ti’ Cuba.
Le xíimbalilo’, yaan u ts’o’okol tak 3 ti’ diciembre, le ken k’uchuk Plaza Antonio Maceo. Ba’ale’, tak 4 ti’ diciembre ken mu’ukuk tu kúuchil Santa Ifigenia. Fidel Castro Ruz síij 13 ti’ agosto ti’ u ja’abil 1926 tu yúuchben kaajil Birán, Cuba.
