Notimex
Oochel: Rodrigo Díaz Guzmán
K'iintsil
Martes 18 ti' octubre, 2016
Uxmal, Yucatán
U mola’ayil Patronato de las Unidades de Servicios Culturales y Turísticos (Cultur) tu káajsaj jump’éel meyaj ku k’aaba’tik Diálogos del sol y la luna, tia’al u péektsilta’al ichil táankelem paalal u jejeláasil ba’alo’ob yaan ti’ maaya tuukul. Le meyaja’, táakbesa’an ichil Festival Internacional de la Cultura Maya (Ficmaya).
Tu súutukil u ts’a’abal k’ajóoltbil tu yúuchben kaajil Uxmal, ti’ jump’éel múul meyaj tu beetaj le mola’ayo’ yéetel Instituto Nacional de Antropología e Historia (INAH) j a’alabe’ jaaj táan u kaxanta’al u péektsilta’al ka kaláanta’ak maaya miaatsil, ba’ale’ beyxan ku kaxanta’al ka ka’ansak maaya t’aan.
Le meyajo’ ku beeta’al yéetel xoknáalo’ob ti’ u najil xook Colegio de Bachilleres de Yucatán (Cobay), yaan tu méek’tankaajil Muna yéetel Santa Elena. Ku tsikbalta’al ba’axo’ob yaan ba’al u yil yéetel u kaláanta’al úuchben nu’ukulo’ob, maaya yéetel xookol ts’íib, beeyxan u yila’al bix yanik eek’o’ob, u k’ajla’ayil Uxmal yéetel bix u jejeláasil u beeta’al xak’al xooko’ob.
