Ts'íib yéetel oochel: Ap
K'iintsil
Río de Janeiro, Brasil
Jueves 4 ti' agosto, 2016
Sáamal viernes yaan u káajal tu lu’umil Río de Janeiro, Brasil, u nojochil keetil báaxalo’ob Juegos Olímpicos 2016. Le beetike’, u noj lu’umil México yaan u táakpajal ti’ u noj báaxalilo’ob ku beeta’al ti’ tuláakal yóok’ol kaab, Juegos Olímpicos tu lu’umil Río de Janeiro, ba’ale’ yanchaj u máan 44 ja’abo’ob, tia’al u túuxta’al ti’ le ja’aba’ u ya’abil máaxo’ob yaan u keetel báaxalo’ob ti’ clavado’ob, kóocha’ bola yéetel taekwondo.
Ti’ le ja’aba’ yaan u táakpajal 126 u túul mexicano’ob, tia’al u ketikuba’ob ti’ 27 u p’éel u jaatsil báaxalo’ob. U ts’ook ka táakpaj ya’abach aj báaxalo’obe’, leti’ ka j beeta’ab Juegos Olímpicos tu lu’umil Munich, tu ja’abil 1972, uchak u yantal 174 mexicano’ob, ba’ale’ chéen jump’éel medalla béeychaj u náajlta’al.
Ichil tuláakal le báaxalo’ob beeta’ano’obe’, u noj lu’umil México, u náajaltmaj 62 medalla’ob; 13 ti’ oro, 21 ti’ plata yéetel 28 ti’ bronce.
Beey túuno’, ti’ le aj báaxalo’ob jach k’ajóolta’ano’ob yéetel táan u bino’ob báaxal ti’ le ja’aba’, ti’ yaan Paola Espinosa yéetel Rommel Pacheco ti’ clavados, María Espinoza ti’ taekwondo, Aída Román ti’ u pu’ulul júulte’, ichil uláak’o’ob.
