Carlos Águila Arreola
Oochel: Archivo
K'iintsil
Lunes 16 ti' mayo, 2016
Quintana Roo
Ts’o’ok u máan jo’op’éel ja’ab káajak u ts’aa xook ti’ inglés aj ka’ansaj Alfredo Pool Poot. Ti’ ku meyaj ti’ jo’op’éel najilo’ob xook yaan tu méek’tan kaajilo’ob Quintana Roo, ba’ale’ ts’o’ok u yilik u xoknáalo’ob ku t’aniko’ob maaya’e’ asab séeba’an u kaniko’ob inglés wa ku tso’olol ti’ob ich maaya.
Tu ya’alaje’, yaan jayp’éel talamilo’ob tumen ma’ sáasilchajak bix je’el u páajtal u ma’alo’obkúunsa’al le ts’aa xooko’, tumen ma’ chuka’an u nu’ukulil le najilo’ob xooko’, ts’o’okole’ wa ma’ xan tu kaambal le paalalo’obo’ ma’ tu páajtal u ma’alo’obchajal kex ka yanak le nu’ukulo’obo’.
“Tene’ kin k’a’abéetkunsik maaya tia’al in tsolik ba’alo’ob ti’ in xoknáalo’ob, tumen beyo’ séeb u na’atiko’ob yéetel ku páajtal u t’aano’ob; ba’ale’ yéetel u xookil inglése’, k’a’abéet u babal t’aano’ob yéetel k’a’anan ka yanak nu’ukulo’ob tia’al ka béeyak u yúuchul kaambal”, ku ya’alik Pool Poot.
