U mola’ayil Instituto Nacional de las Mujeres (Inmujeres) yaan u tantal u k’ubik xma’ bo’olili’ u jajal oochel ich náhuatl t’aan ti’ u ju’unil Convención Interamericana para Prevenir, Sancionar y Erradicar la Violencia contra la Mujer k’ajóolta’ab beey Convención de Belém do Pará.
Beey úuchik u je’ets’el tumen u mola’ayil Instituto Nacional de Transparencia, Acceso a la Información y Protección de Datos Personales (Inai) úuchik u beeta’al jump’éel tak pool tumen juntúul ko’olel, máax ts’o’okili’ u k’áatik ka’ach le ju’unila’, xma’ bo’olili’, ti’ mola’ayil Inmujeres, tumen tu ya’alaje’ mina’an taak’in ti’ ti’al u bo’otik u ts’a’abal yéetel u túuxtal ti’ le ju’una’.
También te puede interesar: Deberá Inmujeres entregar documento traducido al náhuatl
Le beetik túune’, Inmujerese’ tu ya’alaj ba’ax k’áata’abe’, tu k’ujsaj tak Comité de Transparencia, tu’ux je’ets’e’ ma’ táan u páajtal u chíimpoltik u ts’aatáanta’al ba’ax ku ya’alal tumen máax k’áat le ju’uno’, ikil u ya’alik mina’an taak’in ti’ ti’al u bo’ole’, tumen ma’ bin jaaj ba’ax ku ya’alik yóok’lal ba’axten ma’ tu páajtal u bo’otik u ts’a’abal ju’un ti’, tumen ma’ tu mokt’antaj u ya’alik u jaajil t’aan, ts’o’okole’ le je’elo’ jump’éel ba’al jeets’el unaj u beeta’al ti’al u páajtal u ts’aatáanta’al je’el ba’axak ku k’áata’al ka sáasilkúunsa’ak.
Ba’ale’, kex beyo’, ti’al u chíimpolta’al páajtalil yaan ti’ máak ti’al u sáasilkúunsa’al meyaj ku beeta’al tumen mola’ayo’ob ku meyajo’ob yóok’lal kaaje’, tu jets’aj ma’ tsaj u bo’ota’al u beeta’al le ju’una’; chéen ba’ax ku k’áata’al ti’ máax takpoolnaje’, leti’ u bo’otik u túuxta’al ti’, ba’ale’ jts’a’ab u páajtalil ti’ xan u bin u ch’a’ik tu kúuchil Unidad de Transparencia láayli’ xma’ bo’olili’, ken béeyak u bini’.
Beey túuno’, Inaie’ tu jet’saje’ Inmujerese’ unaj u k’ubik jajal oochel ju’un ku k’áata’alo’, ts’o’okole’ xma’ bo’olili’.
Xak'alutskíinsa'an tumen: Sasil Sánchez Chan
