de

del

Nasty Lady, xyukatekail koonol ku meyajtik sexual nu’ukulo’ob

Ma' yáax yanak koonol je'el bix je'ela' tu kaajil Jo'
Foto:

Úuchik u jach lúubul u yóol tumen ma’ utschaj tu yich mix jump’éel meyaj ku ts’a’abal ti’e’, Jazmín Martínez máax yaan 24 u ja’abile’, tu p’ataj meyaj yaan ka’ach ti’ jump’éel notariaa, ka’aj káaj u kunik sexual nu’ukulo’ob yéetel uláak’ ba’alo’ob, tu noj kaajil Jo’. Walkila’, ku ya’alike’ ki’imak u yóol yéetel ba’ax tu beetaj, ts’o’okole’ ichil jump’éel p’iis k’iine’ ku yantal tak ka’ak’áal u téenal u k’áata’al ba’alo’ob ti’, tu kúuchil Instagram Nasty Lady. 

Kax ka’ap’éel ja’abo’ob yéetel uláak’ táan chúumuk paachile’, Jazmíne’ taakchaj u k’áatik u meediasil red ti’ Internet, ba’ale’ tu tukultaje’ ku k’áatik ka’ap’éele’ ku yutstal u konik le uláak’ jump’éelo’ ichil u k’ajóolalo’obo’. “Laj konchaj le meediaso’ ka tin ka’a manaj uláak’ tu’ux yanchaj in náajal. Ba’ale’ jujump’íitil úuchik u bin u k’áata’al ten uláak’ ba’alo’ob, ka’aj káaj túun in kaxtik uláak’ tu’ux ku ko’onol le ba’alo’oba’ yéetel bajux u tojol, chéen ka tin wilaje’ táan in beetik tuláakal ba’ax kin beetik walkila’”, ku tsikbaltik Martínez. 

Ka’aj káaj u pak’be’en k’oja’anil COVID-19e’, Jazmine’ ti’ ku meyaj ka’ach ti’ jump’éel notaría, tumen leti’e’ tu ts’o’oksaj u xookil áabogada, ba’ale’ ma’ ki’imak u yóol te’elo’, ts’o’okole’ ku tsikbaltike’ chan sajakchaj u p’atik u meyaj tumen jeets’el u náajal, ba’axe’ Nasty Ladye’ táan u jach k’áatik ti’ ka u ts’áaj u yóoli’, “tin jach tukultaj ba’ale’ tin wa’ale’, ko’ox beetej”. 

Nasty Lady ts’o’ok u chan nojochtal ichil u k’iinilo’ob pak’be’en k’oja’anil, ts’o’okole’ ku ya’alik jak’a’an u yóol u yilik bix utsil k’a’amik ba’ax ku konik, le beetik walkila’, Jazmíne’ ku beetik sexual nu’ukulo’ob je’el bix íinmobilisadooro’ob, u ba’alil u k’a’axal k’ab, aarneso’ob, igueero’ob, u ba’alil kaal beeta’an yéetel k’éewel, nook’, ichil uláak’ ba’alo’ob. Ku manik u nu’ukulil ti’al u beetik, je’el bix aargoyáas, k’éewel yéetel metal; beyxan u jóok’smaj u kúuchil ti’al u meyajtik yéetel ku beetik ba’ax ku k’ubéenta’al ti’.  

“Káaj in beetik u mejen ba’alil kaal, chéen yéetel éenkaje’, ts’o’okole’ káaj in beetik aarneso’ob; tu jach áanten in wilik ti’ Internet bix le ku beeta’alo’ob ti’ uláak’ u lu’umilo’ob yóok’ol kaab. Tu noj kaajil Jo’e’ mina’an ka’ach mixba’al beya’, ba’ale’ juntúul in láak’ ku beetik páawo’obe’ tu tsolajten jump’íit ba’ax unaj u k’a’abéetchajal ten ti’al in beetik”. 

Nasty Lady ku konik xan sexual báaxalo’ob, je’el bix plug ti’al u yiit máak, diildo’ob, yéetel bíibradooro’ob, tumen beey u k’áata’al ti’. Jazmine’ ku káajal u meyaj 9 ja’atskab k’iin tak las 2 wa 3 tu táal u píik’il, u núupe’ ku yáantik u t’ox u k’ubenilo’ob beeta’an Jo’ ti’al sábados, ts’o’okole’ ku k’a’abéetkunsik xan u yáantajil uláak’ juntúul xch’úupal ti’al u páajtal u laj ts’o’oksik ba’ax ku k’áata’al ti’.  

Martíneze’ ku tsikbaltik, yaan ba’alo’ob k’aas ucha’an ti’ yéetel ba’ax ku beetik, tumen yaan xiibo’obe’ “chéen kéen in wile’ ku túuxtik u yoochel u keepo’ob”.  

Xak'alutskíinsa'an tumen: Sasil Sánchez Chan