Ikil je’ets’ u t’aanil ti’al u yúuchul múul meyaj ichil Red Feminista Quintanarroense yéetel Poder Legislativo, ti’al u ts’aatáanta’al patjo’ol meyajo’ob tukulta’an ti’al u kaláanta’al u sexuaal yéetel réeproduktiboo páajtalil ko’olel, u kúuchil Oficina de Alto Comisionado para los Derechos Humanos méek’tanta’an tumen Organización de las Naciones Unidas (ONU-DH) tu ya’alaje’ uts ba’al jóok’ik ti’ líik’saj t’aan beetachaj.
Ti’ jump’éel k’a’aytajil ts’íib jóok’sa’ab tumen máax chíikbesik ONU-DH tu lu’umil México, Guillermo Fernández-Maldonadoe’ tu ki’imak óoltaj úuchik u yantal mokt’aan le miércoles máaniko’, ichil Red Femnista Quintarroense yéetel u díiputadoilo’ob ti’ u Legislaturail Quintana Rooe’, tumen tu k’iinil 27 ti’ noviembre ti’ u ja’abil 2020 ka’aj to’ok le kúuchilo’ tumen ko’olelo’ob ti’al u chíikbesik u líik’sik u t’aano’ob.
También te puede interesar: ONU-DH celebra acuerdo entre Congreso y Red Feminista Quintanarroense
Mokt’aan beeta’abe’ ku jets’ik le 15 ti’ febrero ku náats’ala’ u XVI Legislaturaile’ yaan u beetik jump’éel túumben tsolk’iin ti’al u táakpajalo’ob yéetel u meyajo’ob yéetelo’ob, tu’ux ka béeyak u xak’al tukulta’al tuláakal patjo’ol meyajo’ob ku k’áatik xlíik’saj t’aano’ob, je’el bix u yéensa’al paal, ti’al ka yanak tsikbalo’ob, kéet tsikbal yéetel u jaatsilo’ob meyajo’ob, je’el bix u je’ets’el yéetel u yoksa’al ti’ yéeytambal wa ba’ax ti’al u ts’o’okbal pleenóo, ichil 16 yéetel 24 ti’ febrero. Beey túuno’, unaj u k’a’ajsa’ale’, le diciembre máaniko’ díiputaado’obe’ ts’o’okili’ u jets’iko’ob u jets’iko’ob u ts’ook t’aanil tak tu ts’o’okbal abril.
ONU-DH ku ya’alike’ le mokt’aana’ jump’éel “utsil e’esajil tumen jump’éel bix u chíimpolta’al líik’saj t’aan ku beeta’al ich xma’ loobilaje’, leti’ u táanilkunsa’al u táakpajal yéetel u yúuchul tsikbal yéetel máax k’áatik wa ba’ax, ti’al u múul ch’a’abal u t’aan utsil ba’alo’ob”.
Fernández-Maldonadoe’ ku ya’alik ONU-DH tu lu’umil Méxicoe’ ku ki’imak óoltik u yantal u k’iinil meyaj ti’al túun u páajtal u ts’aatáanta’al u páajtalil ko’olelo’ob yéetel xch’úupulal kaja’ano’ob yéetel kuxa’ano’ob te’e noj lu’umo’, ts’o’okole’ ku chíimpoltik bin u k’a’ananil ko’olel ku líik’stik u t’aan tumen ku táakmuk’tiko’ob u yantal meyaj ti’al u chíimpolta’al u páajtalilo’ob je’ex unaje’.
Xak'alutskíinsa'an tumen: Sasil Sánchez Chan
