Te’e k’iino’oba’, u mola’ayil Instituto Nacional de Transparencia, Acceso a la Información y Protección de Datos Personales (Inai) tu jets’aj u t’aan ti’al u k’áatik ti’ Secretaría de Trabajo y Previsión Social (STPS) ka bin u ts’aatáanto’ob páajtalil yaan ti’ kajnáal kuxa’ano’ob yéetel je’el ba’axak díiskapasidaad, ti’al túun u yantal u páajtlil ti’ob u yojéeltiko’ob ba’al je’el bix unaje’, chéen ba’axe’ yéetel ba’alob jets’a’an je’el u páajtal u k’a’abéetkunsiko’obe’, tumen ma’ seen úuchake’, mola’aye’ tu k’ubaj chéen ti’ ts’íibil ju’une’, u núuktajil ba’ax táan ka’ach u k’áata’al tumen juntúul máak ma’ sáasil u yichi’, le beetik tu k’áataj ka túuxtak u juumilt’aan ich MP3.
También te puede interesar: Ordenan a STPS entregar información accesible a invidente
Kéen núuka’ak wa ba’ax tumen mola’ayo’ob ba’ale’ ma’ no’ojan ti’al máax yaan ti’ob díiskapasidaade’, ku péech’óoltik páajtalil yaan ti’ kajnáalo’ob, le beetik unaj u ts’aatáanta’al ba’ax ku yúuchul, beey tu ya’alaj Inai.
Le beetike’, yanchaj u k’áata’al ti’ STPS ka u k’ub u ts’íibil Word yéetel u juumilt’aan MP3, je’el ba’axak ju’un ka u táakmuk’t u poliitikail meyaj jetsa’an ti’al máax kuxa’ano’ob yéetel díiskapasidaad, beyxan ba’ax nu’ukbesaj yaan u ti’alo’ob yéetel taak’in xupa’an ja’ab man ja’ab tu yóok’lal, tu k’iinil meyajnaj jala’ach Vicente Fox Quesada, Felipe Calderón Hinojosa yéetel Enrique Peña Nieto.
Úuchik u tsikbaltik ba’ax úuch tu táan u jeel máako’obe’, máax ts’a’aban meyaj Inai, Adrián Alcalá Méndez, tu ya’alaje’, yanchaj juntúul máak k’áat ka sáasilkúunsa’ak ba’al ti’, chéen ba’axe’ tu k’áataj ka ku’ubuk ti’ Word yéetel MP3 tumen ma’ sáasil u paakati’ yéetel istikyáaj u péek, ba’ale’ mola’aye’ chéen tu k’ubaj Word.
“Je’el bix u bin u ts’a’abal k’ajóoltbil ba’al ti’al u yutsil ojéelta’al tumen je’el máaxake’, yaan xan k péektsiltik yéetel k kaxtik u ts’aatáanta’al u páajtalil wíinik kuxa’an yéetel je’el ba’axak díiskapasidaad, ba’ale’ yaan xan k-ilik ka béeyak páajtalil yaan ti’ob ti’al u yojéeltik ba’ax u k’áat u yojéelto’ob”; tu ya’alaj Alcalá Méndez.
Xak'alutskíinsa'an tumen: Sasil Sánchez Chan
