Yóok’lal meyaj ts’o’ok u beetik ti’al u péektsiltik yéetel u táamuk’tik maaya t’aane’, jka’ansaj Ricardo Enrique Cetina Florese’, k’u’ub ti’ tumen Congreso del Estado u chíimpolalil “Diputado Pánfilo Novelo”, tumen ts’o’ok maanal 29 ja’abo’ob jo’op’ok u meyaj ti’ u najilo’ob xook Educación Indígena ti’ u lu’umil Yucatán.
Chíimpolale’ k’u’ub ti’ Cetina Flores tu táan u láak’o’ob láak’intej, tumen xdíiputadail María Teresa Moisés Escalante, máax chikbes u jeel léejisladooro’ob ku meyajo’ob te’elo’, ts’o’okole’ tu k’a’ajsaj jka’ansaj Pánfilo Novelo, máax tu tich’aj ka’anal u kaajal yéetel, kex ts’o’ok u chan máan ja’abo’ob kíimike’, láayli’ u k’a’ajsale’.
Jump’éel bix u k’a’ajsa’ale’, leti’e’ chíimpolala’, tumen ts’a’aban u k’aaba’ ti’ yéetel ku k’u’ubul ti’ yúukatekoilo’ob beetik k’a’anan ba’alo’ob.
También te puede interesar: Congreso de Yucatán entrega reconocimiento al maestro Ricardo Cetina
“Te’e súutuka’ táan u k’u’ubul chíimpolal ti’ jka’ansaj Ricardo, máax jach u k’ubmaj u yóol ti’al u ye’esik xook yéetel ts’íib ti’ maaya paalal ichil u t’aanilo’ob”, tu ya’alaj.
X díiputadae’ tu ya’alaje’, Cetina Florese’ ts’o’ok 29 ja’abo’ob káajak u meyaj, ts’o’okole’ ma’ je’elki’, yéetel te’e k’iino’oba’ tu’ux ts’o’ok u máansa’al u jejeláasil talamilo’ob yóok’lal pak’be’en k’oja’ane’, leti’e’ tu kaxtaj bix u ts’áak u nu’ukil u meyaj ti’al ma’ u jáawal u ts’áak xook ti’ maaya paal, ichilo’obe’ tu ye’esaj xooko’olob yéetel woojo’ob.
Tu súutukil úuchik u t’aan jka’ansaje’, tu ts’áaj u níib óolal u láak’o’ob tumen u yáanta’al yéetel ti’ ajka’ansajo’ob ku múul meyajo’ob yéetel.
“Yaan ajka’ansajo’obe’ jach táaj u yaabilmajo’ob maaya t’aan, le beetik tene’ kin láak’intiko’ob tumen leti’ob máax péeksik ba’al. Yaan máaxo’ob u jach ts’áamaj u yóolo’obi’, le beetik ku bino’ob lalaj p’is k’iinil wa lalaj jo’olajun k’iino’ob te’e kaajo’ob tu’ux mina’an senial ti’ le mejen paalalo’obo’”, tu ya’alaj.
Tu tsikbaltaje’, tak walkila’, ts’o’ok u patjo’oltal maanal ti’ bulukp’éel nu’ukbesajil meyaj ti’al u páajtal u ts’áako’ob xook ka’alikil táan u máan u pak’be’en k’oja’anil COVID-19, je’el bix le 4 mil u p’éel pik’il ju’uno’ob t’o’ox ti’al u kaambal le paalalo’obo’. Ajka’ansaje’, tu tsikbaltaj xan ti’ leti’e yanchaj u páajtallil u múul meyaj yéetel Pánfilo Novelo, ts’o’okole’ ti’ leti’ bin tu kanaj u ye’esik maaya yéetel báaxalo’ob.
Cetina Flores ts’o’okoli’ u yáax k’amik u chíimpolalil ABC “Juntos aprendemos” tu ja’abil 2017. Beyxan le ja’ab máaniko’, 2020, tu patjo’oltaj u áanalte’il “Kin kaambal tin najil”, tumen tu yilaj mina’an mix máaben cha’an mi senial ti’al u kaambal le mejen paalalo’obo’.
Xak'alutskíinsa'an tumen: Sasil Sánchez Chan
