Kéen jo’op’ok u xíimbal máak te’e jáal ja’o ku páajtal u cha’antik u jats’utsil p’oto’ob kuxa’ano’ob te’elo’. Waxaktúul u jejeláasil le ch’íich’ ojéela’an yaan yóok’ol kaab, ba’ale’ tu petenil Carmene’ kaja’an le k’ajóolta’an bey pardo (Pelecanus occidentalis), máax méek’a’an tumen u baatsil pelecanidaes.
Ángel Leyva Herrera, máax beetik u séekretarioil fauna silvestre ti’ u mola’ayil Desarrollo y Medio Ambiente, ku tsolik le ch’íich’a k’ajóolta’an yóok’lal bix u k’u’ukmel, mixba’al ti’ wa xibil wa xch’upul ba’alche’, ts’o’okole’ aal u wíinkilal.
“P’oto’obe’ je’el u p’isiko’ob tak jump’éel meetro yéetel 40 séentimetroo’ob, ts’o’okole’ ku jach chíikbpajal ti’ bix yanik yáanal u koj, tumen óoli’ beey usta’an yanik ti’; te’elo’ je’el u líik’sik tak 11 liitros yéetel ku tukulta’ale’ ku ka’atéen wa óoxtéen máansik le beyka’aj ja’ ku páajtal u yoksik tu nak’”.
Xak'alutskíinsa'an tumen: Sasil Sánchez Chan
