Kex ma’ jach jeets’el jaytúul wakax okolta’ab tu ja’abil 2020 yéetel tu káajbal 2021, Unión Ganadera Regional de Campeche tu ts’áaj k’ajóoltbile’, u yokolta’al wakaxe’ ku beetik u sa’atal taak’in tak yóok’ol 1.5 miyoonesil pesos ja’abmanja’ab ti’ máaxo’ob tséentik idchil xamanil le noj lu’umo’, tumen leti’e baanta’a tu’ux suukchaj u meyajta’alobi’.
Omar Arjona Ceballos, tu ya’alaje’, ajtséen wakaxo’ob ti’ u lu’umil Kaanpeche’ ma’ táan u takpoolo’ob, tu juunalo’ob ku yilko’ob ka ts’a’abak u si’ipil máax ku yookol, tumen jo’olpóopo’obe’ ma’ táan u jach xak’altiko’ob ba’al je’el bix unaje’ yéetel jach ka’anantsil u ti’alo’ob u bino’ob tak u noj kaajil Kaanpech ti’al u beeta’al ba’ax ku k’áata’al ti’ob ti’al ka béeyak u ma’achal máax beetej.
También te puede interesar: Abigeato afecta a Campeche y deja pérdidas de 1.5 mdp anuales
Tu ya’alaje’ tu kaajil Escárcega, Palizada yéetel Candelaria leti’e tu’ux ku asab okolta’al wakaxi’, ba’ale’ ojéela’an ku yúuchul xan Carmen yéetel Champotón, tuláakal le kaajo’oba’ tu noojolil le noj lu’um p’aatalo’ob, ts’o’okole’ beeta’an tak poolo’ob úucha’ak u yokla’al ajtséen wakaxo’ob, u yokla’al wakaxo’ob yéetel uláak’ ba’alob yaan ba’al u yil yéetel le meyaja’.
“Máaxo’ob k meyajtike’ ma’ táan u beetiko’ob tak pool, u jaajile’, kex tumen yaan a’almajt’aano’obe’ láayli’ u yokolta’al ba’alche’ob ku tséenta’al tu noojolil Kaanpech, ts’o’okole’ u bin máak tak Fiscalía General del Estado de Campechee’ jach chéen ti’al u pe’ertik máak k’iini’, tumen ti’al u beeta’al tak poole’ jach talam ba’ax ku k’áata’al, ts’o’okole’ kéen k’uchuk u súutukil u tso’olol tuláakal u ju’unilo’obe’, mix u yojelo’ob ba’ax k’a’abéet u beetiko’obi’, ts’o’okole’ tak máaxo’ob ku chu’ukul táan u yookolo’obe’ kéen u bo’oto’ob wa bajuxe’ ku cha’abalo’ob tuka’atéen”, tu ya’alaj.
Tu tsikbaltaje’ kex tumen xoka’an jaytúul wakax ku yokolta’ale’ ichil jump’éel ja’abe’, yaan xan uláak’o’ob ku yúuchul ma’ táan u beeta’al u takpoolil tumen ma’ táan u páajtal u ya’aliko’ob máax beetej, tumen yaan ajtséen waxakao’ob ku yoksa’al saajkil ti’ob tumen, chéen ba’axe’ ma’ táan u ts’aatáanta’alo’obi’.
Beyxan tu ya’alaje’ mantats’ u tsikbalo’ob yéetel u múuch’ilo’ob ajtséen wakaxao’ob te’e kaajo’obo’, yéetel máaxo’ob ts’o’ok u tsikbaltiko’ob ti’ múuch’tambalo’obe’, ka u k’a’abéetkunso’ob ts’oon ti’al u paklan kaláantikubáajo’ob, le beetik ts’o’ok u k’áatiko’ob ti’ jala’acho’obe’ ka u ma’alobkúunso’ob kanan ku beeta’al, tumen kéen okolta’ako’obe’ ku k’askúunta’al ba’ax u ti’alo’ob yéetel sajbe’entsil xan yanik u kuxtalo’obi’.
Xak'alutskíinsa'an tumen: Sasil Sánchez Chan
