de

del

Agencias
Oochel Ch’a’aban Twitter Joaquín López Dóriga
K'iintsil

Tijuana, México.
Lunes 26 ti' noviembre, 2018

Táanxel máako’ob ti’ centroamericae’ táan ka’ach u náats’alo’ob, tu k’iinil jo’oljeak, tu xuulil u lu’umil México yéetel Estados Unidos, ba’ale’ j k’a’amo’ob yéetel gas lacrimógeno tumen u aj kanan kaajil le lu’umo’, tumen yanchaj máak tu yóotaj u p’it reeja ts’a’aban ti’al u ja’atsal le ka’ap’éel lu’umo’oba’.

Ana Zúñiga, juntúul x hondureñail, máax yaan 23 u ja’abile’, tu ya’alaj tu yilaj yanchaj jaytúul ti’ le táanxel kajilo’ob tu potajo’ob jump’éel jool ti’ le áalambre ts’a’abano’, le beetik aj kanan kaajo’obe’ tu yets’ajo’ob gas. Yanchaj x wo’okinil yéetel ya’ab máak sak’sak’kaalnaji.

“To’one’ áalkabnajo’on, ba’ale’ ken jo’op’ok a wáalkabe’ ku asab ku’upul u yiik’ máak’”, tu ya’alaj ti’ AP ka’alikil táan u kuchik u yaal Valery máax yaan óoxp’éel u ja’abil.

Beey túuno’, yanchaj tak u hélicopterosil Patrulla Fronteriza ti’ u lu’umil Estados Unidose’, káaj u sutulsuut yóok’ol le tu’ux yano’obe’, ka’alikil aj kanan kaajo’obe’ tu jach ch’úuktajo’ob ba’ax ku yúuchul paach u áalambreil jatsik California.

Beyxan le tu’ux u páajtal u k’áatal máak ti’ u k’áak’nabil San Ysidro, Californiae’ láayli’ k’a’alo’obe’, beey úuchik u ts’a’abal k’ajóoltbil ti’ Twitter, tumen u kúuchil meyaj Patrulla Fronteriza ti’ u noj kaajil San Diego.

U kúuchil meyaj Servicio de Aduanas y Protección Fronteriza ti’ u lu’umil Estados Unidose’, tu jets’aj u k’a’alal bejo’ob ti’al ma’ u máan mix jump’éel kis buuts’ mix xan xíimbal máak las 11:40 horas ti’ le kaajo’.

Yanchaj kex 500 u túul aj táanxal máako’ob tu yóotajo’ob k’áatal te’elo’, ts’o’okole’ tu multajo’ob kanan táan ka’ach u beeta’al tumen u máakilo’ob Estados Unidos yéetel México, tu’ux yaan Tijuana. Yanchaj xiibo’ob yéetel ko’olel u lóotmaj tak u paalal, ba’ale’ kex beyo’ ma’ j ts’ab u páajtalil u máano’ob.