Ap
Oochel Rt
K'iintsil
Génova, Italia.
Jueves 16 ti' agosto, 2018
U jala’achil u lu’umil Italiae’, tu jets’aj lajka’ p’éel winalo’obe’ sajbe’entsil yanik u kaajil Génova, úuchik u níikil jump’éel puente, tu’ux jkíim kex 42 u túul máako’ob te’e noj kaajo’, beey úuchik u je’ets’el le miércoles máanika’ tumen u yáax ministro italianoil , Giuseppe Conte.
Ba’ax je’ets’e’, k’a’aytab p’el ts’o’okik u beeta’al jump’éel múuch’tambal tumen ministro’obe’, tu’ux a’alab u ts’a’abal jo’op’éel millonesil euros ti’al u yáanta’al le kaajo’.
Le je’elo’, je’ets’ ti’al ka éejenta’ak u beeta’al meyajo’ob tu’ux ka séeb yanak áantajil tu paach le ba’ax níiko’, tumen jump’éel ti’ le asab k’a’anan noj bej yaan te’e baantao’, leti’e’ tu’ux ku núup’ul lak’in yéetel chk’in ti’ le péetlu’umil je’elo’.
Beyxan je’ets’ tumen Contee’, ka yanak u súutukil yaj óol ti’ tuláakal le noj lu’umo’, yéetel tu ya’alaj ts’o’ok u je’ets’el u meyajta’al tuka’atéen noj bejo’ob tumen u mola’ayil Autostrade, ti’alinta’an u 30 por cientoil tumen u baatsil Benetton.
Jach ma’ sáam ti’ le je’elo’, u jala’achil le noj lu’umo’ tu k’áataj ka luk’uk u yuumil jo’olbesik le mola’ay kaláantik ka uts yanak le puente jníiko’.
Yáax ministroe’, láak’inta’an tumen viceprimeros ministros Luigi Di Maio yéetel Matteo Salvini, yaan u jets’ik juntúul máax ken u jo’olbes meyajilo’ob ti’al ka jeel beeta’ak.
Leti’e’ yáax ba’al táan u ch’a’anukta’al u beeta’al tumen u jala’achil le noj lu’umo’, jump’éel k’iin máanak u júutul u noj bejil Génova.
Júut kex doscientos metros ti’ u puenteil Morandi, ku p’isik mil 182 metros u chowakil yéetel u ka’analile’ ku p’isik 90 metros, yanchaj máax kíim te’elo’ ts’o’okole’ u xéexet’aj le pak’o’obo’ tu pech’aj kex 30 u p’éelel kis buuts’o’ob, ichilo’obe’, óoxp’éel camiono’ob.
Ichil yáax ba’ax je’ets’ u beeta’al tumen jala’ache’, leti’e’ ka je’ets’ek u yutsil kaláanta’al le kajtalilo’ob úuch loobti’ob yóok’olal le ba’ax níiko’, yéetel xan u ts’áak tu’ux u yantal maanal 600 u túul máaxo’ob laj k’aschaj ba’alti’ob.
“Le je’ela’, jump’éel k’aasil ba’al úuchij yéetel ma’ tu páajtal u éejenta’al ka úuchuk ti’ le k’iino’ob yano’ona’”, tu yaj óoltaj Conte, máax tu ya’alaj xane’, u jala’achil le kaajo’ yaan u yilik ba’ax ken u beetej ma’ili’ je’ets’ek máax ti’ yanchaj u kuuch si’ipil úuchik u júutul puente.
“Najmal k ilik ka yanak u jach utsil bejo’ob tu’ux ku máan tuláakal italianoilo’ob”, tu ya’alaj.
“Jach sáasil yanik k’a’anan u yila’al, u ts’aatáanta’al yéetel u kaláanta’al ka utsil yanak le noj bejil je’elo’, ti’al ka k’a’abéetkunsa’ak tumen je’el máaxake’”, tu ya’alaj.
Yáax ministroe’ tu ya’alaj yanchaj 42 u túul máako’ob jkíimo’ob úuchik u júutul puente, 37 ti’ le je’elo’obo’ ts’o’ok u yojéelta’al máaxo’obi’. Uláak’ waxaklajune’ úuch loobti’ob, bolontúul ti’ le je’elo’obe’, jach sajbe’entsil yanik u kuxtalo’ob.
