Te’e k’iino’oba’ u éejidatarioilo’ob Nuevo Xcan, tu méek’tankaajil Lázaro Cárdenase’, tu éejentajo’ob u koniko’ob ti’ Fondo Nacional de Fomento al Turismo (Fonatur) jump’éel k’áax ku p’isik 15.4 ektareas, ti’al u beeta’al jump’éel u kúuchil Tren Maya te’e kaajo’.
Ichil éejidal múuch’tambale’ táakpaj 156 u túul máaki’, táakpaj xan u jo’olpóopilo’ob le kaajo’, yéetel jumpuul úuchik u je’ets’el u ko’onol le k’áaxo’, ts’o’okole’ ba’ax jets’a’abe’ táakmuk’ta’ab tumen juntúul máax tu chíikbesaj Procuraduría Agraria.
También te puede interesar: Aprueban ejidatarios de Nuevo Xcan vender terreno para el Tren Maya
Lilia González Morenoe’, máax ilik u béeytal meyaj ichil u Jaatsil 6 ti’ Tren Mayae’, tu yu’ubaj tuláakal ba’ax ma’ sáasil yanik ti’ máaxo’ob táakpajo’obi’. Beyxan tu ya’alaje’, ti’al bin u patjo’olta’al bix kun chíikpajal kúuchil kun ts’áabil te’elo’, yaan u táakbesa’al kaaj, ts’o’okole’ Fonature yaan u láak’intik tuláakal le meyajo’ob kun beetbilo’obo’.
Beey túuno’, éejidatario Enrique Canul tu ya’alaje’, ti’ jejeláas múuch’tambalo’ob ku taal u beeta’al tuemn Fonature’ ts’o’ok u yu’ubiko’ob ba’ax kun beetbil yéetel ba’ax utsil ku taasik ti’ob le Tren Mayao’, tumen u yantal le éestasiono’ ku beetik u yantal meyaj tak ti’ le táankelemo’ob yaano’ob te’e kaajo’ yéetel tu bak’pachil.
Le beetike’, tu k’áataj ti’ u yéet éejidatarioilo’ob ka u tukulto’ob ba’ax ku k’áatal ti’ob tumen u jala’achil u noj lu’umil México. “U tuukulil le múuch’tambala’ leti’ k ch’a’ak u t’aanil ba’ax kun úuchul, ts’o’okole’ wa tumen te’ex ka wóotike’exe’, je’el u páajtal u nojochtal Nuevo Xcan, ti’al u yutsil kaaj”, tu ya’alaj.
Xak'alutskíinsa'an tumen: Sasil Sánchez Chan
