K'iintsil
Ap
06/05/2025 | Ciudad del Vaticano
Ma’ili’ kíimike’, papa Franciscoe’ tu síiaj jump’éel papamóvil ti’al u béeytal u k’a’abéetkunsa’al beey unidad médica ti’al u ts’aatáanta’al u paalilo’ob Gaza, beey jts’a’ab k’ajóoltbil le lunes máanika’.
Beyxan jts’a’ab k’ajóoltbil u yoochel le papamóvilo’ ba’ale’ ma’ ojéela’an ba’ax k’iin kéen béeyak u k’a’abéetkunsa’al. U si’ibile’ jts’a’ab k’ajóoltbil le k’iin éejenta’ab tumen Israel yaan u jets’ik u muuk’ yóok’ol Franja de Gaza, yéetel yaan p’áatalo’ob ti’ palestinail lu’um ma’ ojéela’an beyka’aj k’iino’obi’.
“Kéen ka’ je’ebek corredor humanitario tu lu’umil Gazae’ leti’ kéen p’a’atak tu beel ti’al u séeb ts’aatáanta’al paalalo’ob te’elo’”, j-a’alab ti’ k’a’aytajil ts’íib beeta’ab tumen Caritas Jerusalén.
Papamóvile’ yaan u jelbesa’al ti’al u ts’a’abal ichil u nu’ukulil u beeta’al diagnóstico, examen yéetel tratamiento. Caritase’ tu ya’alaje’ yaan xan u ts’a’abal u equiposil prueba, sutura, jeringasa yéetel púuts’o’ob, beyxan ti’al u ts’a’abal oxígeno, vacunas yéetel jump’éel refrigerador.
“Coche jts’a’abe’ u chíikulal yaabilaj, kanan kuxtal yéetel éet yantal j-e’esa’ab tumen Santidad ti’al u yutsil máaxo’ob talam yaniko’ob”, beey a’alab tumen Anton Asfar, máax beetik u secretario generail Caritas Jerusalén.
Tu k’iinilo’ob táan ba’ateltáambal ichil Israel yéetel Gazae’, Franciscoe’ t’aanaj yóok’olal le k’aak’as ba’alo’ob ku beeta’al tumen u ejércitoil Israel, ka’alikil tu k’áataj xan ka su’utuk máaxo’ob macha’abo’ob tumen Hamás tu k’iinil 7 ti’ octubre. Le ja’ab máaniko’, tu k’áataj ka xak’alta’al wa u ba’atelil Israele’ najmal u beetik u seten kíinsa’al máak, wa jump’éel ba’al ma’ táan u éejenta’al tumen Israel.
Franciscoe’ jkíim le 21 ti’ abril máaniko’. 88 u ja’abil ka’achij.
Xak'alutskíinsa'an tumen: Sasil Sánchez Chan
