Tu yáax súutukil lunese’, u k’áak’nabil Veracruze’ tu k’amaj 172 cadetes yéetel ka’atúul oficiales ti’ Heroica Escuela Naval Militar, beyxan juntúul capitán, juntúul oficial yéetel óoxtúul xoknáalo’ob, máaxo’ob na’akano’ob ka’ach Buque Escuela Velero Cuauhtémoc tu jéentantaj puente de Brooklyn tu yáak’abil le sábado máanika’, tu kaajil Nueva York, EU.
Láayli’ u xak’alta’al ba’ax úuchij tumen jkíim ka’atúul máak yéetel úuch loob ti’ uláak’ 20o’ob.
Ti’ k’a’aytajil beet’ab ti’ redes sociales tumen Secretaría de Marina Armada de México (Marina) a’alabe’ yaan uláak’ ka’atúul cadetes yanchaj u ts’aatáanta’al yéetel especialidad, ts’o’oke’ kex tumen tu chan ch’a’ak u yóolo’obe’, yaan u p’a’atalo’ob Nueva York.
Secretaría de Marinae’ tu tsáaj u níib óolalil yóok’olal áantaj jts’a’ab tumen Secretaría de Relaciones Exteriores (SRE) yéetel tumen aerolínea Aeroméxico, tumen tu séebankunsaj u suta’al naval wíiniko’ob tu lu’umil México.
En español: Llegan a Veracruz restos de cadetes del Buque Escuela Cuauhtémoc
Buque Escuela Cuauhtémoc, k’ajóolta’an beey “Embajador y Caballero de los Mares”, k’a’anan ti’al kaambal ku beeta’al tumen naval wíinik, tumen ku biinsik cadetes ti’ jejeláas k’áak’náabo’ob ti’ táanxel lu’umo’ob, ti’al u mu’uk’anchajal kaambal.
Ti’ péepen k’áak’ Boeing 737 u máakilo’ob Marina Armada de México k’ucho’ob tak Heroica Escuela Naval Militar tu kaajil Antón Lizardo, Veracruz.
Te’el aeropuertoo’ bin ch’a’abilo’ob tumen maanal wakp’éel camiones ti’alinta’an tumen Marina, beyxan ambulancias yéetel uláak’ privado kis buuts’o’ob.
U taatasil xoknáalo’obe’ tu jets’o’ob u yantal junsúutuk chíimpolal le 19 ti’ mayo máanika’, ti’al le ka’atúul marinos jkíimo’obo’: América Yamilet Sánchez yéetel Adal Jair Marcos.
Xak'alutskíinsa'an tumen: Sasil Sánchez Cha
