U kúuchil Museo Nacional de Antropología de México chíimpolta’ab tumen u noj lu’umil España tumen tu k’ubaj ti’ Premio Princesa de Asturias de la Concordia 2025, yóok’olal meyaj ku beetik ti’al “u kaláantik yéetel nojba’akúunsik” antropológico ba’al.
Kúuchile’ chíimpolta’ab tumen leti’ k’am “noj meyaj ku beeta’al ti’al u kaláanta’al jun jaats u yóol u antropológicoil ba’alo’ob kaaj, ka’alikil u ye’esik u chíikulal kaaj u k’ajóolmubáaj”, tu ya’alaj máax jo’olbesik u baantail Asturias, tu táan u juradoil le categoría je’elo’, Adrián Barbón, úuchik u xokik acta tu’ex jets’a’ab máax kun chíimpoltbil.
MNAe’ ku yila’al beey jump’éel ti’ maas k’a’ananil museos ichil América Latina, tumen “ku chíikpajal bix u meyajtmil kaajo’ob”, a’alab ti’ k’a’aytajil ts’íib tu jóok’saj Fundación Princesa de Asturias, máax k’ubik ja’abmanja’ab le chíimpolala’.
En español: Museo Nacional de Antropología gana el Premio Princesa de Asturias de la Concordia 2025
Museoe’ yanchaj tu ja’abil 1940 úuchik u máansa’al junjaats ti’ le ba’alo’ob yaan ka’ach tu kúuchil Museo Nacional de Arqueología, Historia y Etnografía tak Castillo de Chapultepec, ba’ale’ le naj tu’ux yaan walkila’ je’ek’abta’ab tu ja’abil 1964. Ti’ le 20 salas yaan te’el museoe’, ku kaxta’al u péektsilta’al arqueológica yéetel etnográfica ba’alo’ob k’a’anan tu noj lu’umil México -tumen yaan kex 30 mil metros cuadrados ts’a’aba’al ti’al e’esajil-, ts’o’oke’ le ja’ab máaniko’, tu píitmanso’ob récord tumen k’uch maanal 3 millonesil máak cha’ani’.
Kúuchil e’esajie’ ku much’ik kex 250 mil úuchben nu’ukulo’ob ti’ u jejeláasil kaajo’ob México. Káaj u much’ik ba’alo’ob ti’al u ts’o’okbal siglo XVIII, ka’aj kaxta’ab monolitos, je’el bix u chíikul Coatlicue wa Piedra del Sol.
Xak'alutskíinsa'an tumen: Sasil Sánchez Chan
