Le martes máanika’ Suprema Corte de Argentinae’ tu jets’aj u si’ipil máax tu beetaj u jala’achil le noj lu’umo’, Cristina Fernández de Kirchner, tu’ux a’alab u yantal u k’a’alal wakp’éel ja’abo’ob yéetel u p’áatal mix bik’in kun béeytal u ka’a meyaj ti’ cargos públicos tumen tuusnaj ka’alikil meyajnaj ti’al le noj lu’umo’, beey jts’a’ab k’ajóoltbil tumen u mediosil le kaajo’.
Úcuhik u tse’elel queja jts’a’ab tumen Fernándeze’, u juesilo’ob Suprema Cortee’ tu chíimpolto’ob si’ipil jets’a’ab tumen tribunal tu ja’abil 2022, ts’o’oke’ tu jets’ajo’ob ma’ tu éejenta’al apelación tu k’áataj Fernández tu táan Cámara Federal de Casación Penal tu’ux láayli’ jets’a’ab yaan u si’ipil.
En español: Corte Suprema argentina confirma condena a prisión por corrupción de ex presidenta Cristina Fernández
72 u ja’abil Fernández, ts’o’oke’ ka’atéen tu beetaj u jala’achil Argentina, yáaxe’ ichil 2007 tak 2015, ts’o’oke’ tu beetaj u vicepresidentail 2019 tak 2023. Jts’a’ab u si’ipil yóok’olal jump’éel ba’al k’aaba’inta’ab “Vialidad”, tu’ux taka’ab u pool tumen táan bin u beetik uts ti’ empresario, Lázaro Báez, úuchik u ts’áak u meyaj obras públicas tu lu’umil Patagonia.
Tumen maanal 70 u ja’abile’, tribuanle’ unaj u jets’ik wa ku ts’áak u páajtalil u p’áatal k’aalil tu yotoch.
Fernándeze’, máax ku ya’alik ma’ jaaj le ba’ax ku ya’alalo’, ku ya’alike’ chéen tu ch’a’abal u paach, ts’o’oke’ ma’ úuch ku k’a’aytik taak bin u ka’ báaxtik política ti’al u beetik u diputadail ti’ yéeytambal kun yantal septiembre.
Xak'alutskíinsa'an tumen: Sasil Sánchez Chan
