Rusiae’ tu pulaj u maas nojoch ataqueil yóok’ol Ucrania te’el áak’abo’, beey tu ya’alaj juntúul ucraniail jmeyaj máak le domingo máanika’, úuchik u bin u piimtal u wa’ak’al ba’al te’elo’, yéetel le jp’áat paachil je’el ba’axak ts’o’ok u beeta’al ti’al u ts’o’oksa’al ba’altetáambal ts’o’ok maanal óoxp’éel ja’abo’ob káajak.
Rusiae’ tu ts’onaj kex 537 u p’éel ba’al ba’al te’el ka’ano’ yóok’ol Ucrania, yéetel u yáantajil 477 drones yéetel señuelos, beyxan 60 misiles, beey a’alab tumen u muuk’ meyajil Ucrania.
Ti’ le je’elo’obo’, 249 u p’éele’ lúubsa’abij, yéetel 226 u p’éele’ sa’atij, míin tumen yanchaj ba’ax k’at u beel.
Wa ku xo’okol drones yéetel u jejeláasil ts’oono’ob, loobilaj beeta’al te’el áak’abo’, leti’e’ tu’ux “maas jach multa’ab” lu’um desde tu k’iinil káajik ba’atel tumen Rusia tu winalil febrero ti’ u ja’abil 2022, tu ya’alaj ti’ The Associated Press Yuriy Ihnat, máax jo’olbesik comunicaciones tu mola’ayil fuerza aérea ti’ u lu’umil Ucrania. Ba’ax beeta’abe’, u ti’al ka’ach u jejeláasil baantailo’ob ti’ le noj lu’umo’, tu’ux táaka’an u chik’inil Ucrania.
Polonia yéetel uláak’ lu’umo’ob múuch’ yaniko’obe’, tu péeksajo’ob péepen k’áak’o’ob ti’al u kaláanta’al u yóok’olil polacoil lu’um, a’alab tumen aérea mola’ay le domingo máanika’. Juntúul máak kíim úuchik u yantal ts’oon yéetel drones tu baantail Jersón, beey a’alab tumen jala’ach Oleksandr Prokudin, yéetel uláak’ kíim ka’aj ja’ats’ u coche tumen jump’éel dron, tu baantail Járkiv.
Beyxan tu kaajil Cherkasy, waktúul máak loobilta’ab, tak juntúul chan paal, a’ala’ab tumen u jala’achil le kaajo’, Ihor Taburets.
Xak'alutskíinsa'an tumen: Sasil Sánchez Chan
