K'iintsil
La Jornada Maya
14/08/2025 | Mérida, Yucatán
U kúuchil Convento de San Antonio de Padua tu noj lu’umil Yucatán tu je’ek’abtaj u joolnajilo’ob yóok’olal xíinximbal e’esajil ku k’aaba’tik Tu k’a’ajsajil Knórosov: In memorian Yuri Knórosov, yaan u béeytal u cha’antal tak le 29 ti’ agosto ku taala’. Ti’al le e’esajilo’ yéeya’ab jejeláas xaak’al meyajo’ob beeta’ab tumen ruso wíinik, ti’al u yojéelta’al máakalmáak u woojilo’ob maaya ts’íib
E’esajile’ béeychaj tumen táan múul meyaj ichil U Jala’achil U Lu’umil Yucatán ikil u k’ubéentmaj meyaj ti’ u mola’ayil Secretaría de la Cultura y las Artes (Sedeculta), yéetel U Embajadaoil Rusia, ti’al u péektsilta’al xaak’al yóok’olal maaya miatsil, tumen beyo’ ku túumbenkunsa’al xan u kuuch ichil u noj ba’alumbáaj miatsil te’el k’iino’oba’.
Meyaj beeta’ab tu ja’abil 1950 tumen j-úuchben ts’íib yéetel jrusoil lingüistae’, tu ts’áaj u páajtalil u ye’esik úuchben maaya ts’íibe’ ma’ u ch’a’amaj u moots chéen ti’ woojo’ob mix xan chéen ti’ ch’íikul wooj, tumen yaan juumo’ob ku chíikbesa’al. Yéetelo’obe’ béeychaj u tukulta’al ba’ax u k’áat u ya’al le woojo’obo’, beyxan u beeta’al u sutt’aanil le maayao’ ti’al u na’ata’al bix u tuukulil le miastilo’.
Úuchik u chúunesa’al e’esajile’, máax jo’olbesik u kúuchil Centro de Estudios Mayas Yuri Knósorov, Galina Ershova, tu beetaj jump’éel noj tse’ek yóok’olal u meyaj Fray Diego de Landa, tumen tu ya’alaje’, k’a’anan ti’al xaak’al beeta’ab tu paach tumen Knórosov.
Tu ts’ook tse’eke’, u jcónsul honorarioil Rusia tu lu’umil Yucatán, Adrián Maldonado Repetto, tu chíimpoltaj u k’a’ananil u beeta’al meyajo’ob beya’, tumen ku péektsilta’al juntúul jnoj xaak’al, ba’ale’ beyxan u mu’uk’ankúunsa’al ba’ax p’ata’ab ti’al maaya miatsil ichil u kaajil le k’iino’oba’.
Xak'alutskíinsa'an tumen: Sasil Sánchez Chan
