K'iintsil
La Jornada
28/10/2025 | Ciudad de México
Chéen p’el máanik tu metaile’, Yareli Acevedo tu tich’aj u k’ab ti’al k’iimbesaj, ka tu bak’ubáaj yéetel u banderail México. Ma’ kuneni’, xmexicoil pedalistae’ tu béeykunsaj u yáax kúuchil tu keetil puntos ti’ u Campeonatoil Mundial de Ciclismo de Pista.
Keete’ jbeeta’ab tu kaajil Santiago, Chile’. Acevedoe’ tu k’amaj 63 puntos; tu paache’ jp’áat británicail Anna Morris, máax ti’ yanchaj 58 yéetel tu ts’ooke’ ti’ yanchaj Bryony Botha ti’ u noj kaajil Nueva Zelanda, máax ti’ yanchaj 56.
Xmexicoile’ tu na’ataj bix k’a’abéet u beetik ba’al. Jump’éelili’ bix úuchik u bin u chichil, ba’ale’ ka’aj k’uch tak tu ts’ook jaatsile’, tu jach chichkúunsaj u bin ti’al beyo’ u p’áatal te’el yáax kúuchilo’. Ka’aj juumnaj xk’olom ti’al u ts’ook vueltae’, tu séebkunsaj u bin tak ka’aj yanchaj ba’ax k’a’abéetchaj ti’ ti’al ka p’áatak tu jach yáaxil.
Yéetel ba’ax tu béeykunsaje’, u ka’atúul xmexicoil máax u náajaltmaj jump’éel mundial, tu paach Nancy Contreras, máax tu yáax béeykunsaj tu keetil contrarreloj tu kaajil Amberes 2001.
Le ja’abil 2025a’, jump’éel ti’ le maas jach ma’alob ti’al Acevedo. Tu winalil marzoe’ tu k’amaj oro ti’ keetil eliminación ich Copa de Naciones de Ciclismo de Pista, tu kaajil Konya, Turquía. Ts’o’oke’ tu winalil abrile’, tu ye’esaj tuka’atéen beyka’aj no’ojanil ti’al ba’ax ku beetik, tumen tu pruebasil scratch, eliminación yéetel ómnium.
Tu winalil julioe’, tu béeykunsaj oro xan tu keetil eliminación ich ko’olel tu keetil CL2 Summer Slam, yanchaj tu kúuchil Velo Sports Center ti’ u noj kaajil Los Ángeles, California.
Tu Mundialil Chilee’, tu ts’o’oksaj u keetil ómnium ichil le 5 yáax kúuchilo’obo’.
Ichil uláak’ ba’alo’obe’, Ricardo Peñae’ tu ts’o’oksaj eleminación ti’al xiib, tu kúuchil 11; ti’ jts’o’ok ti’ ichil le keetilo’.
Xak'alutskíinsa'an tumen: Sasil Sánchez Chan
