Ts’a’ab k’ajóoltbil noj meyaj taak u beeta’al ti’al u to’okol kaaj ti’ óotsil kuxtal tu noj lu’umil México

U múuch’kabil Acción Ciudadana Frente a la Pobreza tu ts’áaj k’ajóoltbil u meyajil 10 rutas para un México libre de pobreza, yéetel le ku kaxta’al u beeta’al jejeláas meyajo’ob, tu’ux tukulta’an tak u táakbesa’al  u mu’uk’ankúunsa’al u políticasil jala’ach. Meyaje’ tsikbalta’ab tumen jejeláas múuch’o’ob meyaj ti’al u yila’al wa je’el u ch’a’ak bej u beeta’ale’ yéetel ti’al xan u na’ata’al ba’axo’ob je’el u k’a’abéetchajal ti’al u béeytal.  

Lajunp’éel meyajo’obe’ tukulta’an u beeta’al ti’ jump’éelili’ bej; k’ujsa’al najilo’ob xook ti’ u maas jach óotsil kaajo’ob yaan; u káajsa’al bachilleratos técnicos “duales” ti’al u no’oja’an yantal meyaj; u yantal uts meyaj ti’ táankalam paalal ma’ béeychaj u xokik universidadi’; u yantal serviciosil ti’al u táakbesa’al ko’olel ti’ náajal taak’in; u yantal uláak’ meyajo’ob ti’al u yantal náajal taak’in ti’ u noojolil lu’um tu’ux yaan máasewal kaajo’ob; u yutsil bo’ota’al máak yóok’olal u meyaj; u ts’a’abal u serviciosil salud ti’ máaxo’ob mina’an u meyajo’ob de formali’; u nupa’al u nu’ukbesajilo’ob kaaj yéetel u chíimpolta’al u páatalil wíinik; yéetel jump’éel u túumben modeloil producción yéetel consumo responsable beyxan sostenible.

Ichil u yáax máalil xaak’ale’, ila’ab beyka’aj no’oja’anil wa ka beeta’ak, beyxan wa je’el u ch’a’ak beje’ yéetel ba’axo’ob talamil je’el u tíip’il wa ka beeta’ake’. Graciela Teruel, máax jo’olbesik u jaats meyajil Estudios Sociales ti’ u noj najil xook Universidad Iberoamericana, tu ya’alaje’, lalaj meyaje’ ila’an bix u wa’atal tu beel, tumen beyo’, u káajbale’, le tu’ux yaan pisoe’, juntakáalili’ ti’al tuláakal máak, je’ex mejen paalal, ti’al xan u tséentalo’ob tu beel. 

Ka’alikile’, Emilia Ramíreze’, máax jo’olbesik GOYN tu noj kaajil Ciudad de México, tu ya’alaj k’a’anan u yantal meyaj te’el najilo’ob xook tu’ux yaan táankelemo’obe’ ti’al xan u meyajta’al le ba’axo’ob ku binetik ti’ob ti’al u yutsil yantalo’ob ich kaaj. Le beetik ku tukulta’al u yantal múul meyaj yéetel kaaj ti’al u ts’a’abal u yáax meyajo’ob tu’ux ka utsil bo’ota’ako’ob yéetel ka béeyak u kaambalo’ob.