U keetil Juegos Olímpicos de Milán-Cortina k’uch tu ts’ook tu k’iinil jo’oljeak ka’aj tu’up k’áak’ jóopsa’ab te’el noj kaajo’ob tu’ux jbeeta’ab le noj keetilo’oba’, tu súutukil úuchik u beeta’al u kláausurail tu yúuchben kúuchil Arena de Verona.
Te’el súutuko’, yanchaj italiail óok’ot yéetel paax. Noj íinbernal keetilo’obe’ ts’o’oksa’ab kex yanchaj u páayt’aan ti’al u yawta’al jach ko’oj yéetel ya’ab ba’al k’askúunta’ab te’el noj lu’umo’.
“Ti’ jump’íit ja’abo’obe’ ts’o’ok u xu’upul u milesil miyoonesil euros ti’al u beeta’al le keetilo’oba’, u ya’abile’ ti’al u líik’sa’al noj kúuchilo’ob kex ma’ ya’ab u k’a’abéetkunsa’al tumen kaaji’”, tu tak poltaj juntúul ti’ le máaxo’ob beet páayt’aan, Simone Zambrin.
En español: Noruega dominó los Juegos Olímpicos de Milán-Cortina
Ka’aj k’a’ayta’ab ts’o’ok le keetilo’obo’, máax jo’olbesik Comité Olímpico Internacional, Kirsty Coventry, tu ya’alaje’ “tu kaxto’ob bix u túumbenkunsa’al u beeta’al le keetilo’oba’”.
Tu ts’ooke’ yanchaj 116 u p’éel keetilo’ob, yéetel yanchaj medaayas ti’ waxakp’éel jejeláas oliimpikóo deporteob ti’ 16 u p’éel díisipliinaob, tu’ux yáax táakbesa’ab eski de montanyáa.
Keetilo’obe’ ti’alinta’ab tumen Noruega, tumen leti’ noj lu’um jo’olbes méedayeróo, tumen tu béeykunsaj 41 u p’éelal, ti’ le je’elo’obo’, 18 u p’éelale’ de oro; ti’ Estados Unidose’ yanchaj 33 u p’éelal, yéetel ti’ le je’elo’obo’ 12 u p’éelale’ de oro. U yóoxpáak u máan táanil Noruega. Tu ja’abil 2018, tu kaajil PyeongChang tu béeykunsaj 39 medayaob; 14 u p’éelale’ de oro. Beyxan, tu ja’abil 2022e’, tu noj kaajil Pekíne’, tu k’amaj 37 yéetel ti’ le je’elo’obo’ 16 u p’éelale’ de oro.
Edición: Ana Oraz
