Lúubul ku beetik náajal ku jóok’ol ti’ u meyajil iinduustryáa tu lu’umil QRoo yéetel Kaanpech

Quintana Roo yéetel Kaanpech tu’ux maas jach p’íitchaj áaktibiidad íindustrial ichil u noj lu’umil México; tu paache’ ti’ yaan Coahuila, ka’alikil Yucatáne’ jna’ak 4.1 por siiento ti’ u taasail anual keetel yéetel u winalil noviembre ti’ u ja’abil 2025, láayli’ xan te’el k’iino’obo’ ba’ale’ ti’ u ja’abil 2024, beey tu ts’áaj k’ajóoltbil Indicador Mensual de la Actividad Industrial por Entidad Federativa (IMAIEF) meyajta’an tumen Instituto Nacional de Estadística y Geografía (Inegi).

Quintana Roo túune’, ya’abchaj 8.7 por siiento keetel yéetel noviembre beyxan octubre máaniko’obo’, kex tumen wa ku ke’etel u túulis ja’abile’ leti’e’ noj lu’um tu’ux maas jach p’íitchajij, tumen tu chukaj 30.3 por siiento meenos; ba’ale’ ti’ uláak’ lu’umo’ob, je’el bix, Hidalgoe’, tu’ux láayli’ tu chukaj 30.3 por siiento, ba’ale’ lelo’ ka’antaj tu beetaj.

Kaanpech túune’, chéen jna’ak 0.1 por siiento keetel yéetel u winalilo’ob octubre yéetel noviembre máaniko’obo’, ba’ale’ wa ku ke’etel tu túulisil ja’abe’ ku yila’ale’ j-éem 15.5 por siiento meenos icil noviembre 2025, yéetel láayli’ te’el winal je’elo’, ba’ale’ ti’ u ja’abil 2024.

U lu’umil Yucatáne’ chéen leti’e’ tu’ux maas jach ka’anchaj ba’ali’: 0.4 por siiento maas te’el winalo’, yéetel 4.1 por siientoil maas ti’ u keetil le ja’abo’, beey tu ya’alaj IMAIEF meyajta’an tumen Inegi.

U taasail anual u winalil noviembre ti’ u ja’abil 2025, ichil u meyajil Mineríae’ tu chíikbesaj chan nonojchaj tu lu’umilo’ob Tamaulipas, Estado de México, Chiapas, Sinaloa yéetel Veracruz.

Yóok’olal u meyajta’al, u máansa’al, u k’íitbesa’al yéetel u ko’onol éenerjiya eelektrika, ja’ beyxan gaas náaturale’, chíikpaj ka’anchaj Querétaro, Tlaxcala, Chiapas, Sinaloa, Nayarit yéetel Oaxaca.

Ti’ kóonstruksyoone’ maas ka’anchaj Jalisco, Sinaloa, Aguascalientes, Nuevo León, Hidalgo yéetel Baja California Sur, ichil uláak’o’ob.