U noj lu’umil Chinae’ tu ts’o’oks u líik’sik u nojoch pláataformaail eoolikáan ich k’áak’náab, de 16 méegabatios, ich taamtam ja’ob, kex 70 kms náach ti’ jáal ja’, yéetel tu’ux maanal 50 metros u taamil, aktáan ti’ chan kaajil Cantón, ikil táan u beetik jump’éel meyaj táan u kaxtik u nojochkíinsik meyajo’ob yóok’olal le jejeláasil éenerjiaa’.
Kúuchile’ pata’an u k’aaba’ beey ‘Sanxia Linghang’, ts’o’oke’ beeta’an tumen u mola’ayil China Three Gorges Corporation. Jts’a’ab tu yáak’abil sábado, ichil u ja’il u noj kaajil Yangjiang, beey tu ts’áaj k’ajóoltbil le domingo máanaika’ ti’ u kúuchil péektsilo’ob Xinhua.
Sistemae’ ku nupkinsik meyaj jump’éel aerojéenerador jach ya’ab u káapasidad yéetel jump’éel pláataforma ku flootáar ich ja’, yéetel jump’éel túumben siistema, tu’ux je’el u chukik 20 meetros u ka’analil oolas k’áak’náaab, yéetel u chukik kex 73 meetros por segundóo u chichil u jaats’ iik’.
Ichil le túumben ba’axo’ob ts’a’abane’, mola’ay tu ya’alaje’ yáax juntéel u k’a’abéetkunsa’al, te’el noj lu’umo’, u kaablesil polieester jach mu’uk’a’an u meyaj ti’al u béeytal u jets’ik tu’ux ku machkubáaj le pláataformao’, tumen ku béeytal u kóoliko’ob u éenerjiail le oolaso’, ikil u yúuchul ba’ax k’ajóolta’an beey déeformasyoon elaastikáa, yéetel tumen ku p’íitkunsik muuk’ ku éets’el yóok’ol le kúuchilo’.
Pláataformae’ ku táakbesik jump’éel túumben sisteemail lastre ku p’iiskúunsik tu juunal le beyka’aj ja’ k’a’abéet ti’ u koolumnasil, ti’al u beetik u wa’atal tu beel le kúuchilo’, je’el bix xan jump’éel kaable t’uba’an ich ja’ de 66 kilobooltios beeta’an ti’al u béeytal u meyaj kex wa jach talam yanik bix u péek’ k’áak’náab.
Xak'alutskíinsa'an tumen: Sasil Sánchez Chan
