K'iintsil
La Jornada
23/07/2026 | Ciudad de México
U noj keetil Copa Mundial de la FIFA 2026, tu kóolaj tu noj kaajil Ciudad de México, Guadalajara yéetel Monterrey kex 7 millones 800 mil ajxíinximbal máako’ob ti’ uláak’ u kaajilo’ob México, ba’ale’ beyxan ti’ táanxel lu’umo’ob; tu beetaj u suut kex 65 mil millonesil pesos yéetel yanchaj 130 mil 900 u p’éel meyajo’ob, beey tu ts’áaj k’ajóoltbil tumen u mola’ayil Secretaría de Turismo (Sectur) le miércoles máanika’.
Le beyka’aj xoka’abo’ maanal ti’ le beyka’aj tukulta’ab tumen le mola’ay kun k’uchulo’, antes u káajal le noj keetilo’, tumen tu yáax a’alaje’, yaan u kóojol kex 5.5 millonesil ajxíinximbal máak; yaan u náajalta’al maanal mil millonesil dólares (17 mil 880 millones de pesos yéetel u tipoil cambio jo’oljeak miércoles) yéetel yaan u yantal kex 24 mil u p’éel meyajo’ob.
Tu noj lu’umil Méxicoe’ báaxta’ab 13 u p’éel u partidosil Mundial; j t’o’ox ichil Ciudad de México, Guadalajara yéetel Monterrey.
U datosil Secture’ ku ya’alik ichil u k’iinil 8 ti’ junio tak 19 ti’ julioe’, tu noj lu’umil Méxicoe’, kóoj 7 millonesil 800 mil u túul máak.
Yaane’ xáanchaj kex jump’éel k’iin te’el kaajo’obo’, ba’ale’ yaan xane’ chéen k’áatmáan tu beetajo’ob, ma’ tu chukaj mix jump’éel k’iin ula’ano’obi’.
Ichil ba’ax a’alab xan tumen mola’aye’, j chu’up tu 66 por cientoil hotelo’ob te’el óoxp’éel noj kaajo’obo’, ts’o’oke’ lelo’ tu chíikbesaj ya’abach 13 por cientoil yóok’ol le beyka’aj yanchaj ti’ le ja’ab máaniko’, láayli’ te’el k’iino’ob xano’; ts’o’oke’ chéen ti’al u k’iinilo’ob yanchaj partidoe’, j chu’up ichil u 85 yéetel u 90 por ciento le hotelo’obo’.
Beey túuno’, yóok’olal conectividade’, u kúuchilo’ob u jáayal péepen k’áak’e’ tu beeto’ob u béeytal u péek 6 millonesil 400 mil máako’ob; ti’ le je’elo’obo’, kex 4 millonesil 200 mil máake’, kóojo’ob ti’ uláak’ u kaajilo’ob México, yéetel uláak’ 2 millonesil 200 mile’, ti’ uláak’ táanxel lu’umilo’ob.
Xak'alutskíinsa'an tumen: Sasil Sánchez Chan
