Le martes máanika’, tu tíitubáaj lu’um yéetel u muuk’il 7.1 tu noj petenil Kyushu, Japón, tu kaajil, ka’aj tu beetaj u níikil jump’éel noj kúuchil koonol.
Yóok’olal le je’elo’, ya’abach máak sa’atij yéetel ti’ uláak’o’obe’ j-úuch loob, beey a’alab tumen u meyajnáalilo’ob jala’ach. Le beetik xan te’el súutuko’, yanchaj u k’a’aytal u sajbe’entsil u yantal tsunami.
U ka’ t’o’olil u kúuchil koonol Aeon Mall tu kaajil Kashima Town, níikij ka tu k’alaj ya’abach máaki’. Ma’ ojéela’an jaytúuli’. Kex ichil 20 tak 30 ajmeyaj máako’ob saatal, ts’o’oke’ ya’abach uláak’o’obe’ yanchaj u jóok’sa’alo’ob ka’aj biinsa’abo’ob tu najil ts’ak yaj, beey úuchik u ya’alal tumen u kúuchil péektsilo’ob Kyodo.
En español: Terremoto de 7.1 golpea el sur de Japón; derrumbe de centro comercial deja desaparecidos
Kaaj tu’ux maas jach úuch loobe’, ti’ yaan kex 900 kms tu noojollak’inil Tokio. K’a’aytajil beeta’ab yóok’olal u sajbe’entsil tsunamie’, beeta’ab ti’al u k’áak’náabilo’ob Ariake yéetel Yatsushiro tu chik’in jáal ja’ilo’ob Kumamoto, yéetel uláak’ u méek’tankaajilo’ob naats’ yaan, ba’ale’ tu jo’oloj ka’ap’éel horae’ k’a’ayta’abe’ ts’o’ok u máan le sajbe’entsilo’, beey a’alab tumen Agencia Meteorológica de Japón.
Yáax ministra Sanae Takaichi tu ya’alaj ti’ periodistase’, yaan bin u reportesil bejo’ob k’aschaji, beyxan puentes yéetel uláak’ kúuchilo’ob, je’el bix xan tu’ux mina’an sáasil yéetel tu’ux joopol k’áak’, kex tumen te’el súutuko’, ma’ sáasil yanik jach bix yanik ba’al. Agencia de Gestión de Incendios y Desastres tu ya’alaje’ mina’an reportes bin beeta’an ti’ u noj instalacionesil kaaj beyxan ti’ le kúuchilo’obo’.
Autoridad de Regulación Nuclear tu ya’alaje’ ma’ xan kaxta’ab wa ila’ab yaan ba’al jela’an ti’ u yóoxp’éel central nuclear naats’ te’elo’. Kyodo tu ya’alaje’, ti’ jump’éel u najil ts’akyaj yaan tu kaajil Yatsushiro, k’ama’ab kex 40 máak ucha’an loob ti’ob, yéetel uláak’ kex 50 yanchaj u bisa’al ti’ uláak’ kúuchil yaan tu noj kaajil Kumamoto.
Xak'alutskíinsa'an tumen: Sasil Sánchez Chan
