Romina Hinojosa béeychaj u ts’o’oksik u ka’ jaatsil Tour de Francia Femenil

Xmexicoil Romina Hinojosa (Lotto-Intermarché Ladies) béeychaj u ts’o’oksik u ka’ jaatsil Tour de Francia Femenil. Xneerlandesil Lorena Wiebes (SDW) máan tu jach táanil le beetik béeychaj u p’áatal ti’ u k’an nook’il, maillot amarillo, ku chíikbesik yáax leti’ yaan ichil tuláakal le ku ketikubáajo’obo’. Paachil ti’e’ yanchaj Kimberley Le Court, tu náachil 14 segundos ichil le generalo’, yéetel xmonarcail Tour 2023, Demi Vollerin, 16 segundos pachil p’áatij. 

Xtamaulipasil táakpaje’, tu yáalkabtaj xan bẹj tu chukaj 147.9 kilómetros u chowakil, ichil Aigle yéetel Ginebra, u ya’abile’ táax lu’um ba’ale’ yanchaj xan jo’op’éel ka’anal tu’ux na’akij, 

Hinojosae’ tu k’ataj u metail tu penultimoil kúuchil (138) ti’ jun jaats bej tu’ux jp’áat óoxtúul ko’olel: Ebras Elisabeth, Meert Marieke yéetel Ervloet Sterre. Leti’obe’ tu p’ato’ob noj keetile’ tumen jach táaj ka’ano’ob yéetel tumen jlúubo’ob xan.

Xmexicoile’ béeychaj u p’áatal ichil le keetilo’, yéetel tu yáantaj xan uláak’ juntúul u yéet ko’olel ku yáalkab xan Linda Riedman, lti’al ka p’áatak tu kúuchil 10 ichil u tablail general. 

Junsúutuk antes u káajal jaaste’, Hinojosae’ tu ya’alaj jach ki’imak u yóol tumen ki’imakchaj u yóol xan mexicoil kaaj, úuchik u yila’al u túumben táakpajal te’el keetilo’. 

Mix 30 kilómetros u bin ti’al u k’uchul tu ts’ooke’, ka’aj máan táanil Riejanne Markus (Lidl-Trek), le beetike’ le 80 ko’olel táan u yáalkabo’obe’, yanchaj u t’u’ulpachtiko’ob ti’ bej tu’ux chéen juntúul ku béeytal u máani’. Pelotóne’ chéen jump’éel minuto náach yanik ti’, ba’ale’ tak tu puntae’ ti’ yaan Lorena Wiebes, máas kaláanta’an u bin tumen u jeelo’obo’, yéetel leti’ máax tukulta’ab kun jach máan táanili’. 

Tukulta’ab jp’áat paachil Wiebes, yéetel yaan u kóojol Markus tu juunal te’el metao’,.Ba’ale’, ti’ ts’ook súutukil antes u k’uchulo’ob tu ts’ooke’, u múuch’ ko’olelo’obe’ séebchaj u bin ka’aj tu xaankunsaj u bin Markus, máax tu k’amaj u chíimpolalil combatividad úuchik u púuts’ul, Le beetik túun béeychaj u chíikpajal Wiebes ka’aj jach mu’uk’anchaj u písxo’ob tak ka’aj tu k’ataj meta tu ukp’éel jaats le keetilo’.