Enrique Méndez y Néstor Jiménez
U Mola’ayil Pat A’almajt’aano’ob, Cámara de Diputados, tu éejentaj u beeta’al jump’éel k’eexil ti’ u a’almajt’aanil Ley Federal de Derechos de Autor, ti’al u kaláanta’al meyaj ku beeta’al tumen máasewal múuch’kaajo’ob yéetel u kaajilo’obe ti’al ma’ u yokolta’al u tuukulil yéetel ba’ax ku beetiko’obi’, tumen ya’abach juntéenake’ táanxelil mola’ayo’ob okoltik, ts’o’okole’ ku koniko’ob kex ma’ cha’abani’ wa mix táan u bo’otiko’ob taak’in unaj u ts’áako’ob ti’ kaaj tu yóok’lal.
K’eexil beeta’abe’, jumpuul úuchik u éejenta’al yéetel 441 u p’éel yéeyajo’ob; beeta’ab ikil u kaxta’al u kaláanta’al “ba’ax ku patjo’olta’al yéetel ku beeta’al tumen máasewal múuch’kaajo’ob yéetel u kaajilo’ob, tumen ba’ax u yojelo’obe’, je’el bix u bin u ch’íijil máake’, beey u bin u máansik ti’ u jeelo’ob ku taal tu paach, ts’o’okole’ ku chíikbesik k’a’anan ba’al ti’ miiatsil, oksaj óol yéetel kuxtal, le beetike’, yóok’lal bix úuchik ti’alinta’al le ba’alo’oba’ tumen kaaje’, ma’ táan u páajtal u jéets’el chéen juntúul u yuumil mix xan táan u páajtal u ja’atsal”.
También te puede interesar: Aprueban diputados Ley de Derechos de Autor para pueblos indígenas
Tu yóok’lal k’eexile’, Armando Contreras ti’ u múuch’kab almejen Morenae’, tu ya’alaj bine’, meyaj ku taal u beeta’al tumen kaajo’obe’ ma’ sáasil yanik te’e a’almajt’aano’, ts’o’okole’ ya’abach juntéenake’, talam xan u yojéelta’al ich máakalmáak miaats siijil u tuukul, le beetike’ séeb u yokolta’al u chíikul u meyajo’obi’.
Yéetel k’eexil beeta’ab túun ti’ Ley Federal de Derechos de Autor, ku je’ets’el u kaláanta’al tuláakal miatsil yéetel meyaj ku beetik máasewal kaajo’ob yéetel u múuch’kaajilo’obi’, “le beetik túune’, nojoch mola’ayo’obe’ ma’ tána u páajtal u ya’aliko’ob wa ma’ u yojel ba’ax ku beetiko’ob kéen u ch’a’aj u chíikulal u meyaj máaswalo’ob ichil ba’ax ku beetiko’obi’”.
Ti’ jets’ t’aan beeta’ab tumen Comisión de Culturae’ ku ya’alike’ u jejeláas táanxelil mola’ayo’obe’ u ch’a’amaj u nooyil u meyaj máasewal kaajo’ob yéetel u múuch’kaajilo’obe’ ti’al u beetiko’ob nook yéetel nu’ukulo’ob ti’al u ko’ono’ob, chéen ba’axe’ mix táan u k’áatiko’ob wa ku páajtal u ch’a’ako’ob ti’ u yuumil, máaxo’ob mix táan xan u bo’otalo’ob tu yóok’lal patjo’ol u beetmajo’obi’, tumen beey unaj u beeta’al yéetel je’el máaxak ka u k’a’abéetkuns u meyaj wa máax patjo’oltej.
Beyxan a’alabe’, k’eexil beetchaje’ jach k’a’anan ti’al u kaláanta’al ba’ax u yojel yéetel patjo’ol u beetmaj máasewal kaajo’ob, le beetik walkila’, ts’o’ok u ju’unil k’eexile’, ts’o’ok u túuxta’al tu táan U Mola’ayil Jets’ A’almajt’aan, Senado, ti’al u tsikbalta’al yéetel u éejenta’al wa tumen uts u k’a’amal xan.
Xak'alutskíinsa'an tumen: Sasil Sánchez Chan
