Ti’ jump’éel xaak’al beeta’abe’, chíikpaje’ ti’ lajuntúul nojoch máako’ob yaan waxaktúule’ yaan u táakpajal ti’ yéeytambal; beey úuchik u káajal u k’iinil yéeybal tu noj kaajil Jo’, tu’ux chíikpaj xane’ jo’olpóop u k’áatmaj majank’iino’obe’, Renán Barrera Concha yaan u 98% u k’ajóoláanili’ yéetel yaan 30.2% máax a’alike’ ti’ leti’ kéen u ts’áaj u yéeyaj; paachil ti’e ku taal Jorge Carlos Ramírez Marín, máax ti’ yaan u 18% u yéeyajil kaaj, beyxan u 20% máaxo’ob k’áatchibta’abe’ ma’ u yojel máax ti’ kéen u ts’áaj u yéeyajil, beey chíikpaj ti’ xookil beeta’ab ti’al u yojéelta’al máax ti’ kun ts’áabil yéeyajil tu noj kaajil Jo’, meyajta’ab tumen Poll Position ti’al La Jornada Maya.
También te puede interesar: Con alta intención del voto en Mérida, Renán Barrera empieza con ventaja
Xookile’ beeta’ab icihl u k’iinil 3 tak 5 ti’ abril, ti’al u páajtal u yojéelta’al bix táan u káajal u xookil máaxo’ob bíin u ketikubáajo’ob ti’al u beetik u jo’olpóopil u noj kaajil Jo’, tu’ux chíikpaj tak walkila’ táanil yanik Barrera Concha wa ku t’aan máak yóok’lal jayp’éel yéeyaj yaan tu fáabor, tumen kéen p’ata’ak tséelik máaxo’ob ma’ u yojelo’ob máax ti’ kéen u ts’áaj u yéeyajo’ob yéetel máaxo’ob xmukul u ti’alo’obe’, ku taal u p’áatale’ 46.5% tu tséelik jo’olpóop u máajantmaj k’iino’ob u ti’al leti’; 28.5 ti’al Ramírez Marín, máax táaka’an ti’ u múuch’kab almejenil Partido Revolucionario Institucional (PRI) yéetel Revolución Democrática (PRD), ti’al Verónica Camino Farjate’ yaan u 19.6%, tumen táan u táakpajal ichil Movimiento Regeneración Nacional (Morena), del Trabajo (PT), yéetel Verde Ecologista de México (PVEM).
Yóok’lal le k’áatchi’a’: A k’ajóol wáaj wa a wu’uymaj wa ba’ax yóok’lal… chíikpajae’ Renán Barrera yaan tu poolil úuchik u náakal tak 98.3%; Ramírez Maríne’ yaan 69.8%; Víctor Cervera Hernández, ti’ u múuch’kab almejenil Movimiento Ciudadano, yaan ti’ 48.4%; Verónica Caminoe’ yaan 31.4%; Herbé Rodríguez Sahui, ti’ u múuch’kab almejenil Partido Encuentro Social (PES), yaan 20.2, yéetel Ismael Peraza, táaka’an ti’ Fuerza por México, yaan 12.7.
Kex tumen yaan pak’be’en k’oja’ane’, táan u tukulta’al yaan u yantal ya’abach yukateko’ob kun táakpajal ti’ yéeytambal: u 79.3% tu ya’alaje’ yaan u táakpajal te’e yéeytambalo’, 14.2 tu ya’alaj ma’ xaan ka xi’iki’ yéetel u yalabilo’ tu ya’alaje’ míin ma’ táan u táakpajali’, ma’ táan u bini’ wa ma’ u yojeli’.
Uláak’ k’áatchi’e’ leti’ bix utsil k’ama’an u yóox jaats meyajil jala’ach yaan tu noj lu’umil México. Chíikpaje’ u 73% uts u yilik meyaj ku beeta’al tumen u jala’achil u lu’umil Yucatán, Mauricio Vila Dosal; u jala’achil u lu’umil Méxicoe’, Andrés Manuel López Obradore’ yaan ti 55%, ka’alikil Renán Barrerae’ yaan ti’ 52%.
Yóok’lal ba’ax ku tukulta’al yóok’lal ajbáaxal kuucho’obe’, u 49% tku tukultike’ uts u paktiko’ob Renán Barrera yéetel y 14% ma’ utsi’; ti’ Ramírez Maríne’ yanchaj 18% beey uts paakatil yéetel 14% ma’ utsi’; Verónica Camino 5% uts yéetel 7% ma’ utsi’; Herbé Rodrígueze’ 3% uts yéetel 4% ma’ beyi’; Víctor Cerverae’ yaan ti’ 9% utsil paakat yéetel 8 ma’atech, tu ts’ooke’ Ismael Peraza yaan ti’ 3% uts paakat yéetel 1% ma’ beyi’.
Xookile’ beeta’ab ti’ telefonóo yéetel k’áatchibta’ab 401 u túul máak kaja’an tu noj kaajil Jo’, máax maanal 18 u ja’abil ti’.
Xak'alutskíinsa'an tumen: Sasil Sánchez Chan
