Secretaría de la Defensa Nacional (Sedena) ts’o’ok u k’áatik ti’ Secretaría de Educación de Yucatán (Segey) u xookil jaytúul ajka’ansajo’ob yaan ti’ tuláakal u méek’tankaajilo’ob le lu’uma’, beyxan jaytúul u ajmeyajilo’ob áadministraasioon yéetel míis yaan te’e najilo’ob xook, ti’al beyo’ u páajtal u múul meyajo’ob ti’al ka ts’a’abal u báakunail Covid-19, tumen a’ala’an u ts’a’abal ti’ leti’obe’ tu winalil mayo.
También te puede interesar: Sedena solicita censo de docentes por municipios en Yucatán
Segeye’ tu ts’áaj k’ajóoltbile’, ichil u k’iinil 26 tak 28 ti’ abrile’ yaan u beetik u meyajil yéetel u túumbenkusaj xookil ti’ jaytúul u ajmeyajilo’ob kaambal yaan ti’ le mola’ayilo’. Ichil le xookolilo’obo’ yaan u táakbesa’al máaxo’ob ku meyajo’ob ichil u jaatsilxook inicial tak media superior.
Beyxan, yaan u táakbesik ajmeyajo’ob ti’ najilo’ob xooko’ob puublikóo yéetel pribaadóo, tumen beey jets’a’an unaj u beeta’al tumen nojlu’um.
U mola’ayil Segeye’ ts’o’ok u ts’áak k’ajóoltbile’, le xookil táan u beeta’al walkila’ jach k’a’anan ba’al ti’al u páajtal u tso’olol u k’iinilo’ob yéetel u kúuchilo’ob tu’ux kun ts’áabil báakuna ti’ ajka’ansajo’obo’.
Te’e jaatsilk’iino’oba’, máaxo’ob jo’olbesik najilo’ob xooke’ yaan u laj much’iko’ob ba’ax ku k’áata’al ti’ob. Beyxan wa yaan ba’ax ma’ sáasil yanike’, ku páajtal u t’aan máak ti’ 800 8391888, ts’a’aban tumen Segey.
Tu yóok’lal túune’, jka’ansaj Ricardo Enrique Cetina Flores, máax beetik u súuperbisoril zona 038 ti’ u kajajil Chichimilá yéetel xan máax beetik u Técnico no’ojk’abil ichil Región de Valladolid 1, tu ya’alaj k’a’anan u yojéelta’al uaan u ts’a’abal ti’ob le báakuano’ tumen le je’elo’ ku ts’áak u páajtalil u bin máak te’e najilo’ob xook xma’ sajbe’entsili’.
“Míin ka yanak xook je’el bix chuupil yéetel chochobkil u bin máak ka’ache’, talam tumen ti’ paalalo’obe’ ma’ ts’a’abak báakunai’, ba’ale’ kex beyo’ ku ya’abta’al kananil ku beeta’al te’e najilo’ob xooko’”, tu ya’alaj.
Beyxan, ajka’ansaj tu ya’alaje’ kex mina’an xook ti’al ka xi’ik máak najilo’ob xooke’, yaan ajka’ansajo’ob ku yantal u bino’obi’ tumen ku yantlal u p’atiko’ob ju’uno’obi’, wa ma’e’ ku máan u xíimbalt u xoknáalo’ob mina’an Internet ti’obi’, tumen beey úuchik u kaxtiko’ob bix u beetik u meyajo’obi’.
Unaj u k’a’asja’al xane’, jala’ach Mauricio Vila Dosal tu ya’alaj ku tukulta’ale’, maanal ti’ 67 mil u túul ajka’ansajo’ob yaan, ichil najilxo’ob xook puublikáa, pribadáa yéetel áadministratiibos ts’o’ok u ts’íibta’al u k’aaba’ob ti’al u ts’a’abal báakuna ti’ob.
Ichil ba’ax ts’o’ok u yáax a’alale’, báakuane’ yaan u ts’a’abal ti’ ajka’ansajo’ob ichil u k’iinil 19 tak 28 ti’ mayo, ba’ale’ le je’elo’ yaan u yila’al wa je’el u béeytale’, tumen unaj u yáax ila’al bix kéen k’uchuk báakunao’ob te’e lu’uma’. Le beetik jala’ache’ tu k’áataj ka na’atak tumen ajka’ansajo’obe’ je’el ba’axak ka úuchuk yéetel, tumen jujump’íitil ken xi’ik u je’ets’el ba’al yéetel le je’ela’.
Xak'alutskíinsa'an tumen: Sasil Sánchez Chan
