Tu taal u chíinil k’iin le 2 ti’ mayo máanika’ ka’aj luk’ Isla Mujeres u cheemil La Montaña, tu’ux ku bin máasewal zapatiistaob, máaxo’ob yaan u tuukulil ti’ob u k’uchulo’ob Europa, ti’ ba’ax tu patajo’ob u k’aaba’ beey La Gira por la Vida. Tukulta’an u jóok’olo’ob ka’ach tu k’iinil 3 ti’ mayo, ba’ale’ táanilchajo’ob.
“Ti’al máax táaka’ano’on ich Congreso Nacional Indígena yéetel Concejo Indígena de Gobierno, k bin tak Europae’ ku je’ek’abtik joolnaj ti’al u páajtal k ilikbáaj yéetel máasewal kaajo’ob, beyxan kaajo’ob naats’ yaniko’ob ti’ k’áax yéetel nojkaaj, je’el bix xan múuch’kabilo’ob yéetel mola’ayo’ob péektsiltik yéetel kaláantik u páajtalilo’ob wíinik, beyxan máaxo’ob kaláantik yóok’ol kaab, xoknáalo’ob, ko’olelo’ob líik’sik u t’aan, táankelem máak, táanxel kaajil máax, aj-its’ato’ob; láako’ob yéetel éet xíimbalo’ob táan u ba’atelo’ob yéetel táan u aktáantiko’ob káapitaliismo”, beey a’alab tumen Comisión de Coordinación del Congreso Nacional Indígena ti’ k’a’aytajil ts’íib beeta’ab.
Junjaats Ejército Zapatista de Liberación Nacional (EZLN), k’aaba’inta’ab Escuadrón 421, u tukultmaj u k’uchul kex tu chúumukil junio, tu k’áak’náabil Vigo, España.
También te puede interesar: Zarpa de Isla Mujeres delegación zapatista hacia Europa
“To’one’ taak k kaxtik yéetel k tsikbal yéetel uláak’ máax ku yaj óolal ti’al beyo’ u páajtal k na’atik ba’ax le beetik k múul yantalo’, kex beyka’aj jela’antako’on ichilo’oni’. Ti’al u páajtal k k’ajóoltikbáaj, k tsikikbáaj yéetel k láak’intikimbáaj, ti’al k utsil núup’ul ich láak’tsilil, máaxo’ob táan xan u kaxtik bix u beetiko’ob ba’al tu táan káapitaliismo”, ts’íibta’ab te’e k’a’aytaj ju’uno’.
Múuch’il zapatistaobe’ jo’olbesa’ano’ob tumen subcomandante insurgente Moisés, máax láak’inta’an tumen kantúul ko’olel, ka’atúul xiib, yéetel juntúul wíinik ma’ táan u jets’ik bix u yóol u wíinkilali’, máaxo’ob táaka’an ichil zapatista kaaj.
Máax ku bino’ob te’e cheema’, tu líik’sajubáajo’ob kamp’éel winalo’ob ti’al u páajtal u jóok’olo’ob, ts’o’okole’ ti’ u ts’ook p’iisk’iinilo’oba’ yanchaj u k’alikubáajo’ob ti’al ma’ u yantal mix jump’íit u sajbe’entsil u k’oja’antalo’ob ti’ Covid-19. Leti’obe’ kóojo’ob Isla Mujeres le 30 ti’ abril máaniko’, ti’ u taalo’ob Chiapase’ yéetel láayli’ te’e k’iinil je’elo’, na’ako’ob La Montaña ti’al u k’ajóoltiko’ob tu beel. Tu k’iinil 2 ti’ mayoe’ jóok’ u biinbalo’ob te’e nojoch xíimbala’.
