Quintana Rooe’ jach táaj ta’aytak u suut ti’ chak boonil u semaforóoil tumen ts’o’ok jo’op’éel p’iisk’iinil jo’op’ok u ya’abta’al máax ti’ ku tsa’ayal yéetel ku kíimil yóok’lal Covid-19. Chéen ti’ le ts’ook lajun k’iino’obe’, ts’o’ok u yantal 936 u túul máak tsa’ayak ti’ le k’oja’ana’. Sáansamale’ óoli’ ku yantal 94 u túul máak ku pa’ak’al ti’.
“Quintanarroense’ex, sajbe’entsil yaniko’on k suut ti’ chak boonil. Kin páayt’antike’ex ka k ch’a’ajóolte’ex ba’ax jets’a’an ti’al u kaláantikubáaj máak, ti’al u kaláanta’al meyajo’ob yéetel náajal taak’in yaan te’e lu’uma’”, beey tu ts’íibtaj Twitter u jala’achil le lu’umo’, Carlos Joaquín González.
También te puede interesar: Quintana Roo, en riesgo de regresar a rojo en el semáforo: CJ
Ti’ u ts’ook k’a’aytajil ts’íib jóok’sa’ab tumen Secretaría de Salud (Sesa), ti’al u ts’áak ojéeltbil bix máanik u k’iinil martes 11 ti’ mayoe’, ojéelta’abe’ náak tak 24 mil 266 u túul máax ti’ ts’o’ok u tsa’ayal ti’ le k’oja’ana’, beyxan 2 mil 660 kimen máak tu yóok’lal.
Jo’op’éel p’iisk’iinilo’ob paachile’, ti’al u k’iinil 7 ti’ abrile’, yaan u xookil jaytúul máax ti’ ts’o’ok u tsa’ayale’ k’ucha’an tak 21 mil 545 u túulal, yéetel ts’o’ok u yantal 2 mil 517 u túul máak kimen tu yóok’lal; le túune’, te’e jatsk’iino’oba’ yanchaj 2 mil 721 uláak’ máak tsa’ay ti’ Covid-19, le je’elo’ u k’áat u ya’ale’ lalaj p’iisk’iino’obe’ yanchaj 544.2 u túul máak k’oja’anchaji, maanal ti’ 77 u túul sáansamal.
Le lunes máanika’, u subsekretaarioil Prevención y Promoción a la Salud ti’ u mola’ayil Secretaría de Salud ti’ u lu’umil Méxicoe’, Hugo López-Gatell, tu k’a’aytaje’, 31 u p’éel péetlu’umilo’ob yaane’ táan u chíikbesiko’ob u yéemel u bin u pa’ak’al le k’oja’ana’, chéen ba’axe’ Quintana Rooe’ láayli’ u ye’esik u bin u ya’abta’ale’.
U jala’achil le péetlu’umo’, tu k’a’aytaj u beeta’al túumben ba’alo’ob, je’el bix u beeta’al uláak’ ya’abach prueebasil ti’ máak, beyxan u ts’a’abal uláak’ u tu’uk’ilo’ob kananil, ti’al beyo’ máax kun k’uchul te’elo’ u jéets’el u yóol tumen kaláanta’an u toj óolalo’ob.
Beyxan tu tsolaje’, kex tumen jaaj táan u ya’abal u xookil ti’ máaxo’ob ku tsa’ayal le k’oja’anilo’, ma’ táan u ya’abal máax ku k’uchul ti’ kúuchilo’ob ts’akyaj mix xan le jaytúul máak ku kíimilo’obi’.
Xak'alutskíinsa'an tumen: Sasil Sánchez Chan
